Ya matora ya FERWAFA hamenyekanye igihe azabera

Yanditswe na Rwanda Football ku wa 10.02.2018 saa 09:25 |

Kuri uyu wa gatanu tariki ya 09/02/2018 nibwo habaye ikiganiro n’abanyamakuru cyivuga ku myiteguro y’amatora asubiwemo ya FERWAFA, igihe n’itariki azabera ndetse hanasobanurwa impamvu zatumye ay’ubushize aseswa.

Komisiyo y’amatora ya FERWAFA itangaza ko nta mfabusa bigeze babona mu cyiciro cya mbere cy’amatora, kuko abanyamuryango bose bari bahari babarwa nk’aho batoye, dore ko berekanye ibyangombwa bisabwa byose bibemerera gutora.

Ku itariki ya 30/12/2017 ni bwo habaye icyiciro cya mbere cy’amatora ya Komite nyobozi ya FERWAFA na Perezida wayo, aho byari byitezwe ko Nzamwita Vincent ‘Degaule’ aza kuba ahanganye na Rwemarika Felicite, ariko habura iminota mike ngo amatora atangire, ibintu bihinduka ukundi, Degaule ahita akuramo kandidatire ye bitunguranye.

Ibyo ariko ntibyabujije Rwemarika wari usigaye ari umukandida rukumbi kubona amajwi 13 gusa mu gihe abatoye bari 52, aba atsinzwe amatora atyo kuko atabashije kubona amajwi 51% ateganywa n’Itegeko rigenga amatora ya FERWAFA.

Rwemarika yahise ajuririra icyo cyemezo kugeza mu buyobozi bw’Ishyirahamwe ry’umupira w’amaguru ku Isi (FIFA), maze kuwa 31/1/2018 bwandikira Komisiyo y’amatora ya FERWAFA buyisaba gukemura ikibazo cy’uwo mukandida mu buryo bukurikije amategeko.

Icyakora ngo Rwemarika ntiyigeze atanga ubujurire bwe mu buryo bukurikije amategeko kugeza ubwo igihe ntarengwa kimugereyeho.Ibyo bigafatwa nk’aho yanyuzwe n’ibyavuye mu matora nk’uko byatangajwe na Kalisa Adolphe, Umuyobozi wa Komisiyo y’amatora ya FERWAFA.

Kalisa yagize ati: “Imfabusa ni nk’igihe umuntu yasiribanze, cyangwa se akaba yatoye abakandida babiri. Muri ariya matora si ko byagenze, kuko abantu 13 batoye Rwemarika, abandi 39 ntibamutora […] batanze urupapuro rutanditseho ikintu na kimwe.”

“Ni twe rwego rwa mbere rw’ubujurire, hanyuma hagakurikiraho Komisiyo y’Ubujurire muri FERWAFA. We rero yatanze ubujurire bwe bamusubiza ko ataciye mu nzira nyayo, banamwibutsa ko agifite igihe cyo kujurira, ariko iminsi yarinze imushirana adatanze ubujurire bwe, twe tubifata nk’aho yanyuzwe n’ibyavuye mu matora.”

Rwemarika ari kumwe na Perezida wa FIFA

Yakomeje avuga ko ibaruwa ya FIFA babonye ari iyabamenyeshaga ko yakiriye raporo y’amatora yo kuwa 30/12/2017, igashima ko yakurikije amategeko, inabibutsa ko hari umukandida utaranyuzwe n’ibyayavuyemo, bityo akaba akwiye gusobanurirwa neza kandi ikibazo cye kigakemurwa mu buryo bukurikije amategeko.

Muri ayo matora hitabiriye abanyamuryango bose uko ari 52, maze 13 muri bo batora Rwemarika Felicite, abandi 39 ntibagira uwo batora, bituma uyu mutegarugori atsindwa amatora atyo bitewe n’uko atashoboye kugeza amajwi 51% ateganywa n’amategeko agenga amatora ya FERWAFA.

Ingengabihe y’icyiciro cya kabiri cy’amatora ya FERWAFA:

 – Tariki ya 9/02/2018: Ikiganiro n’abanyamakuru (Cyabaye)

– Tariki ya 19/02 – 23/02: Kwakira amadosiye y’abiyamamaza;

– 28/02 – 2/03/2018: Kwiga ku madosiye y’abiyamamaza;

– Tariki ya 3/03/2018: Kwakira ibyemezo bivuye muri Komisiyo y’amatora y’ubujurire;

– tariki ya 9/03/2018: Gutangaza urutonde ntakuka rw’abakandida;

– Tariki ya 12/03/2018 – 30/03/2018 (00:00am) : Kwiyamamaza;

– Tariki ya 31/03/2018 (2:00pm): Amatora

– Tariki ya 31/03/2018: Gutangaza ibyavuye mu matora;

– Tariki ya 3/04/2018: Gutanga raporo yamatora;

– Tariki ya 6/04/2018: Gushyingura inyandiko.

Tanga igitekerezo na Facebook

Tanga igitekerezo

Powered by Live Score & Live Score App