Waruzi amateka y imikino 75 imaze guhuza APR FC na Rayon Sports ?

Kuri uyu wa kabiri tariki ya 3 Gicurasi 2016 hateganyijwe umukino w’amateka hagati y’abakeba bo mu rw’imisozi 1000, umukino uzahuza ikipe ya APR FC na Rayon Sports. Uyu mukino urabera kuri Stade Amahoro i Remera saa 18:00.

Ni umukino ushobora kwirukanisha umutoza wawutsinzwe mu gihe undi afatwa nk’intwari iyo abashije gutahukana intsinzi imbere ya mukeba.

aprayoncaf

Imwe mu mibare y’ingenzi wamenya hagati y’amakipe yombi

Mu myaka 23 imaze kuva ishingiwe ku Mulindi wa Byumba, APR FC ifite ibikombe 15 bya shampiyona harimo n’icya shampiyona ishize, naho Rayon sports yashingiwe i Nyanza mu myaka 47 ishize ifite ibikombe 7, icyo iheruka yagitwaye mu mwaka w’imikino wa 2012/13 yatwaye nyuma y’imyaka 8 yose itagikozaho intoki.

Guhangana ku makipe yombi, si ubuhanga bwo mu kibuga gusa, kuko n’ak’abafana katiburira, yewe akenshi usanga baba bakaniye umukino kurusha abakinnyi, abafana Rayon sports bita APR FC igikona n’ abafana APRFC bita Rayon sports Gasenyi. Mbere abafana ba Rayon Sports nibo babaga ari benshi cyane bagaragara ariko uko imyaka yagiye ikurikirana ni nako abakunzi b’APR bagiye biyongera.

Rayon Sports niyo kipe ifite abakunzi benshi mu Rwanda
Abafana baba babucyereye ku mpande zombi

abafans
Umwaka wa 2014 ni wo wonyine aya makipe yabashije guhuramo inshuro nyinshi, dore ko yahuye inshuro 4 mu marushanwa atandukanye, ibintu bitigeze bibaho mu mateka y’aya makipe yombi bikunda kuvugwa ko ahuzwa na Leta (ntashobora gukina umukino wa gishuti yiteguriye yo ubwayo).

Muri rusange kuva mu 1995, ufashe imikino ya shampiyona ukongeraho n’andi marushanwa izi kipe zagiye zihuriramo, n’imikino ya gishuti nubwo itabaye inshuro nyinshi usanga Rayon Sports na APR FC zimaze guhura inshuro 75.Muri izo nshuro zose hamwe Rayon Sports yatsinzemo imikino 23 naho ikipe ya APR FC itsindamo imikino 30, zinganya imikino 22.Muri iyo mikino 75 habonetsemo ibitego 220, harimo 106 ku ruhande rwa Rayon Sports n’ibitego 114 ku ruhande rwa APR FC.

N’ubwo nta kipe yari yatsinda indi kabiri kikurikiranya muri shampiyona, APR FC yashoboye gutsinda Rayon Sports kabiri yikurukiranya inshuro ebyiri, muri shampiyona ishize (2014/15), ku gitego 1-0 mu mukino ubanza na 4-0 mu mukino wo kwishyura.

Bwa mbere APR FC yabashije gutsinda imikino ibiri itandukanye ihura na Rayon Sports, ni aho mu mukino wa shampiyona wahuje aya makipe yombi kuya 23/10/2005, APR FC yanyagiyemo Rayon Sports ibitego 3-0, iza no kuyisubira ku ya 01/02/2006 iyitsinda 4-1, mu mukino wari wateguwe na Ferwafa mu rwego rwo kwizihiza isabukuru y’imyaka 30 iri shyirahamwe ryari rimaze ryemewe muri FIFA.

Indi nshuro, hari muri 2012 nyuma y’uko Lionnel St Pleux kuri ubu ukinira Azam yo muri Tanzaniya afashije APR FC kuva inyuma igatsinda Rayon sports 3-2 tariki 29 /2012 muri shampiyona mu gihe iyi yaje no kuyitsinda mu mikino yombi ya 1/2 cy’igikombe cy’amahoro yazihuje uwo mwaka.

Ikipe ya Rayon Sports ifite agahigo ko ari yo yabashije gutsinda ibitego byinshi mu mukino umwe kuko yabashije kunyagira APR FC ibitego 5-2 ubugira kabiri (mu 1996 n’1997).

Abakinnyi n’abatoza bagiye bigaragaza muri uyu mukino

Jimmy Gatete wakiniye aya makipe yombi, ni we ufite agahigo ko gutsinda ibitego byinshi mu mukino uhuza amakipe yombi, dore ko buri kipe yayitsindiye ibitego bine mu mikino itandukanye.Sina Jerôme ari mu bakinnyi batsinze ibitego byinshi muri uyu mukino, aho amaze gutsinda ibitego 6 mu gihe Masudi Djuma ari we wabashije gutsindira APR FC ibitego byinshi, bitanu.

apr_team2
Gatete Jimmy (imbere) ni we watsinze byinshi hagati y’aya makipe yombi yakiniye

Nta mukinnyi uratsinda ibitego 3 mu mukino umwe, aya makipe yombi yahuye. Gusa abakinnyi barimo  Sina Jérôme, Bokota Labama, Lionnel St Pleux, Ruhinda Farouk, Bokungu Ndjoli, Kambale Salita Gentil n’abandi bagiye batsindamo ibitego 2 ku mukino.

Umutoza watoje imikino myinshi hagati y’aba bakeba ni Raoul Shungu watozaga Rayon Sports, watoje imikino 16 yahuzaga aya makipe atsindamo 7, atsindwa 4, anganya 5.

Ndayishimiye Eric Bakame yaciye mu ikipe ya APR FC mbere y’uko yerekeza muri Rayon sports. Mu gihe ku rundi ruhande, Ngabo Albert, Bizimana Djihad, Usengimana Faustin, Ntamuhanga Tumayine Tity na Djamar Mwiseneza aribo bari muri APR FC barakiniye Rayon Sports.

Uretse abakinnyi tuvuze haruguru bagikinira aya makipe yombi, ntawakwirengagiza amazina nka: Jimmy Gatete, Bokota Labama,Haruna Niyonzima, Janot Witakenge, Masoudi Djuma, Hategekimana Bonaventure bita Gangi, Nizigiyimana Kalim Makenzi, Fuade Ndayisenga, Muganza Isaac n’abandi benshi batandukanya bagiye bakinira amakipe yombi.

Haruna Niyonzima kuri ubu ukinira Yanga SC, yanyuze mu makipe yombi
Haruna Niyonzima kuri ubu ukinira Yanga SC, yanyuze mu makipe yombi

Ibihe by’ingenzi byaranze uyu mukino

Ku itariki ya 03/11/1996 i Nyamirambo ku mukino wa nyuma w’igikombe cyari cyateguwe n’ icyahoze ari Kaminuza Nkuru y’ u Rwanda (UNR) (mu rwego rwo gukusanya inkunga yo gusana ibyari byangijwe n’ inkongi muri iyi Kamunuza), Rayon Sports yabashije gutsinda APR FC ibitego 5-2. Yongeye kuyisubira kuri 26/10/1997 i Remera kuri Stade Amahoro ku mukino wo kuyishyikiriza igikombe cya Shampiyona yari imaze kwegukana uwo mwaka, aho na none Rayon Sports yongeye gutsinda APR FC ibitego 5-2.

Abayobozi, abafana n’abakinnyi ba APR FC ntibazibagirwa itariki ya 18 Kanama 2001, muri shampiyona, ubwo Rayon sports yabanyagiye ibitego 4-1, ikaza no gutwara igikombe cya shampiyona ibarusha inota rimwe uwo mwaka, aho yari ifite amanota 61.

Gusa nabo baje gutegereza undi munsi maze bababariza ikipe yo mu Rukari ku mukino wa nyuma w’igikombe cy’amahoro ku bitego 2-1, hari kuya 4 Nyakanga 2002.

Uyu mukino uba urimo ishyaka ryinshi
Uyu mukino uba urimo ishyaka ryinshi

Mu nshuro 2, amakipe yombi yahuriye muri CECAFA (2005 na 2014), bagiye banganya, gusa APR FC igasezerera Rayon Sports hitabajwe amapenaliti. APR FC yabashije gutsinda Rayon Sports ibitego byinshi ku ya 1/2/2006 aho yayitsinze 4-1, mu mukino wari wateguwe na Ferwafa mu rwego rwo kwizihiza isabukuru y’imyaka 30, iri shyirahamwe ryari rimaze ryemewe muri FIFA.

Ikipe zombi zongeye kunganya no ku mukino wa nyuma w’irushanwa ryateguraga shampiyona ryiswe Lotto cup ku wa 14 Ukwakira 2007, Mutarambirwa Djabir atsindira abambara umukara n’umweru, abambara ubururu bishyurirwa na Djamar Mwiseneza, APR itwara igikombe itsinze penaliti 10 -9 za Rayon sports.

Mu 2011-2012, mu gikombe cy’Amahoro, APR FC yatsinze Rayon Sports ibitego 3-1 muri ½ cy’irangiza. APR FC yatsindiwe na Lionel Saint Preux, Kabange Twite na Papy Faty. Impozamarira ya Rayon Sports yatsinzwe na Hamiss Cedric.

Ngabo Albert na Fuade Ndayisenga bombi banyuze mu makipe yombi
Ngabo Albert na Fuadi Ndayisenga bombi banyuze mu makipe yombi

Mu 2012-2013, APR FC yatangiye umwaka w’imikino itwara igikombe cy’isabukuru y’imyaka 25 ya FPR itsinze ku mukino wa nyuma Rayon Sports ibitego 3-1. Ibitego byose byatsinzwe mu gice cya kabiri, APR FC itsindirwa na Ruhinda Farouk, watsinze bibiri n’aho ikindi gitsindwa na Cyubahiro Jacques.Hategekimana Aphrodis “Kanombe” atsindira Rayon Sports impozamarira.

Mu mukino wa shampiyona wo kwishyura, wabaye tariki ya 9 Werurwe 2013, Rayon Sports yanyagiye APR FC ibitego 4-0, bitsinzwe na Hategekimana Aphrodis “Kanombe”, Hamisi Cadric na Kambale Salita “Papy Kamanzi” watsinzemo ibitego bibiri.

Mu nshuro 4 amakipe yombi yahuyemo mu 2014, APR FC yabashije gutsindamo ebyiri, Rayon Sports itsinda imwe, banganya indi (APR FC itsinda Rayon Sports kuri penaliti, hari muri ¼ cya Cecafa y’amakipe yabereye i Kigali muri Kanama 2014).

APR FC ni yo yatsinze umukino uheruka guhuza amakipe yombi ukabonekamo intsinzi, aha hari ku itariki ya 22/02/2015, aho yatsinze Rayon Sports ibitego 4-0 mu gihe umukino uheruka guhuza amakipe yombi vuba aha, hari mu mikino ibanza ya shampiyona y’uyu mwaka w’imikino, banganya ubusa ku busa.

APR FC yatsinze 4-0 mu mukino uheruka
APR FC yatsinze 4-0 mu mukino uheruka

Imikino yose iteganyijwe ku munsi wa 21 wa shampiyona

Bugesera FC vs Rwamagana City- Nyamata
Amagaju FC vs Musanze FC- Nyamagabe
APR FC vs Rayon Sports- Stade Amahoro
Espoir FC vs Marines – Rusizi
SC Kiyovu vs AS Kigali- Mumena
Mukura VS vs Gicumbi FC- Huye
AS MUhanga vs Etincelles- Muhanga
Police FC vs Sunrise FC- Nyamirambo

Tanga igitekerezo na Facebook

Tanga igitekerezo