Wari uzi umutoza Vigoureux wazamuye abakinnyi benshi mu Rwanda

Yanditswe na Admin ku wa 28.07.2015 saa 11:43 | Yasuwe : 3,008

Benshi mu bakinnyi bakomeye ba hano mu Rwanda (ab’uyu munsi n’aba cyera) bakomoka mu mujyi wa Rubavu bazwi ku izina ry’aba “Bresiliens ” kubera ubuhanga bagaragaza mu makipe yabo,  bavuga   ko bose baciye mu biganza by’umutoza w’abana Jitiada Mungo  bakunze kwita « Vigoureux ».

Nk’uko nyir’ubwite abivuga, urutonde rw’abakinnyi bakomeye bamuciye imbere guhera mu 1982, ubwo yiyemezaga kwitangira umupira w’abana ni rurerure.

Bamwe mu bo yibuka, abantu bo muri iki gihe bazi,  barimo uwahoze ari umuyobozi w’akarere ka Rubavu, Sheikh Bahame Hassan na Kayiranga Vedaste kuri ubu usigaye ari Visi Perezida wa FERWAFA yatoje mu 1982.

Mu bandi harimo Nduhirabandi Abdoul Karim uri gutoza Marines FC  yo mu cyiciro cya mbere, Bizagwira Leandre wakiniye Amavubi muri CAN 2004, Shyaka Jean wakiniye Atraco, Uwacu Jean Bosco, Haruna Niyonzima Kapiteni w’Amavubi,  Jacques Tuyisenge kapiteni wa Police, Kapiteni wa APR FC Nshutinamagara Ismael Kodo, Emery Bayisenge werekeze muri Autriche, Nirisalike Salomon ukina mu Bubiligi n’abandi benshi.

Mu kiganiro kirekire yagiranye na Imvaho Nshya, muzehe Mungo aragaraza ubuzima bwe nk’umukinnyi wa Etincelles n’umutoza wahisemo gufasha abana kugira icyo bageraho mu buzima bwabo.

vigoureux1

Jitiada Mungo  “Vigoureux” ni muntu ki?

Nk’uko abivuga afite amazina atatu yahawe n’ababyeyi be ari yo, Mungo Vigoureux Jitiada. Vigoureux riri mu rurimi rw’igifaransa risobanuye umuntu ufite imbaraga, Jitiada ryo ni ijambo ry’igiswahili rivuga ngo “Umunyamurava”.

Yavukiye i Rubavu, kuya 02 Mutarama 1958 ni ukuvuga ko afite imyaka 57 y’amavuko. Abyarwa na Nzirubusa Yussuf na Fatuma Ndabare bose baje kwitaba Imana.Ni umubyeyi w’abana bane (abahungu babiri n’abakobwa babiri), umugore we yapfuye  muri  2007.

Yize amashuri abanza ku ishuri Gatolika rya Gisenyi mu Mujyi wa Rubavu, akomereza ay’isumbuye kuri Institut de Goma yo mu Mujyi wa Goma muri Kongo Kinshasa kuva mu 1973 kugeza mu 1978.

Nyuma yo kwiga , yabonye akazi mu ruganda rw’icyayi rwa Pfunda ku Gisenyi ahava ajya gukora mu ruganda rw’inzoga “Bralirwa”, kugeza ahawe ikiruhuko cy’izabukuru arimo kugeza ubu.

Ni umwe bakiniye Etincelles FC  igishingwa

Vigoreux wakinaga hagati agaruka inyuma (numero 6) avuga ko ari umwe mu batangiranye na Etincelles FC igishingwa mu 1978.Icyo gihe , yatangiye yitwa “Pfunda FC”, bitewe no kuba yarashingiwe ku ruganda rw’icyayi rwa Pfunda mu Karere ka Rubavu , ishinzwe na Kabirigi Boniface wari umuyobozi w’uru ruganda ariko kuri ubu usigaye ayobora uruganda rw’icyayi rwa Shagasha mu karere ka Rusizi .

Mu mwaka wayo wa mbere Pfunda FC yazamutse mu cyiciro cya mbere nyuma yo gutsindirwa na Bugesera ku mukino wa nyuma w’icyiciro cya kabiri.

Mu 1982, Pfunda FC yahinduriwe izina yitwa Etincelles FC  imaze gushyirwa mu biganza by’uruganda rwa Bralirwa. Mu bakinnyi bakomeye bakinanye muri iyi kipe, barimo umunyezamu Nizeyimana Jean, Mbangukira Clement, Kanani François, Nsabimana Jean de Dieu n’umukongomani witwa Babingwa Jemba .

Uyu mugabo, avuga ko Etincelles ari yo kipe akunda mu buzima bwe kuko azi ibigenda n’ibitagenda naho bipfira.

Vigoreux ni umutoza wahisemo gutoza abana gusa

Mu 1982, ubwo yari umukinnyi wa Etincelles akora no mu ruganda rwa Bralirwa, Vigoreux yatangiye kwitabira amahugurwa y’ubutoza yabereye i Nyanza muri uwo mwaka no mu wakurikiyeho , icyo gihe yari kumwe n’umutoza Aloys Kanamugire. Yanitabiriye kandi amahugurwa yo mu 1989, 1994, 1998,2001, 2013 na 2015.

Mu buzima bwe ntaratoza ikipe nkuru  usibye Etincelles FC , ibi nabyo ntibyigeze bimuhira. Kuri we gutoza abana bimufitiye akamaro kenshi.

Ati “Gutoza abana ni amahirwe. Bimpa umutuzo kuko mbikorana ubushake n’urukundo rwa kibyeyi kandi birubaka. Mu makipe makuru umuntu ahora ku gitutu. Natoje Etincelles mu 1996, 1998 no mu mwaka ushize ariko ntibyagenze neza. Nko muri Etincelles, habura umuyobozi uyikorera ushaka ko itera imbere  ni yo  mpamvu mu myaka 8 imaze guhindura abatoza 14.”

Abikora nk’ umuhamagaro , adategereje ubimuhembere

Vigoreux umaze imyaka 33 atoza abana, avuga ko ari ibintu akora adategerejemo inyungu z’amafaranga  ahubwo ari umuhamagaro we wo gufasha abana b’igihugu, bakagera aho bigeza.

Yagize ati “Natangiye kubikora mfite akazi muri Bralirwa, nta nzara nari mfite, nabikoraga ku bushake nkumva mfite amahoro.Hari abana benshi nafashije, batera imbere bagira ubuzima bwiza babinkesha.  Nkubwize ukuri , ntabwo kwinjiza birimo, ni yo bafashe umwana bakamujyana sinjya mburana kuko icyo mba nifuza ari uko uwo mwana agira ubuzima, kereka iyo nk’ikipe yamutwaye  inyibutse cyangwa n’ umwana akanyibuka ariko si kenshi. Ubu nabonye pension muri Caisse social, buri kwezi mbona agashahara kanjye nicaye mu rugo, sinjya nsabiriza ushoboye kunyibuka aranyibuka , utabikoze sinamurenganya aba afite izindi nshingano”.

Kugeza ubu , amafaranga yahawe kubera umwana yareze ni ibihumbi 160, yahawe na FERWAFA ubwo Bayisenge Emery wari muri Academy yayo yerekezaga muri APR FC.

Mu bakinnyi ashimira ko bamuzirikanye harimo Nirisarike Salomon wamuhaye ibikoresho byo gufasha barumuna be yatozaga muri 2012. Hari na Nshutinamagara Ismael Kodo, kapiteni wa APR FC uheruka kumuha imipira 7 yo gukina. Aha kandi ashimira n’abanyamakuru bamuhaye agaciro  muri iyi myaka yose .

vigoureux

Vigoureux hamwe n’umwe mu bo yatoje Nshutinamagara Ismael Kodo, kapiteni wa APR FC

Nk’uko abisobanura,aka kazi gasaba kwihangana kuko benshi mu bana baza batazi no gufunga umupira ariko iminsi ishira bagatera imbere buhoro buhoro.

Yifashishije urugero rwa Leandre Bizagwira,waje mu mwaka we wa mbere agahita ajya muri Etincelles, Vigoreux yerekana ko bisaba kwihanganira.

Yagize ati “Ikintu ndusha abandi ni ukwihangana, hari benshi baza batazi gufunga umupira ariko bakazabimenya. Hari n’abaza bazi gufunga umupira, nk’urugero ni Bizagwira waje umwaka umwe akaba yageze muri Etincelles asigaye abanzamo. »

Akomeza avuga ko  kubona abo yatoje hari aho bigejeje bimushimisha ati   “Biranezeza kubona Salomon, ba Emery baza iwanjye kugira ngo mbasinyire bajye hanze. Biranshimisha kubona ahantu hose nyuze mbona abana natoje bari gukina,abandi bakangisha inama, nk’ejobundi uriya mwana Tuyisenge kapiteni wa Police FC , yashatse gucika intege ngo bamuhinduriye umwanya mugira inama kandi arazikurikiza biranshimisha”.

Jitiada Mungo  « Vigoureux  asoza yemeza ko azahagarika gutoza abana umunsi Imana izamuhamagariraho.

Tanga igitekerezo na Facebook

Tanga igitekerezo