Uwari umunyezamu wa Rayon Sports yerekeje muri Bugesera FC

Yanditswe na Admin ku wa 12.08.2015 saa 15:40 | Yasuwe : 1,413

Umunyezamu Bikorimana Gerard warindiraga Rayon Sports yasezeye ku bafana b’iyi kipe yari amazemo imyaka itatu asinya muri Bugesera FC yazamutse mu cyiciro cya mbere avuga ko agiye bamufitiye ibirarane.

Bikorimana yari umutoza wa mbere mu ikipe ya Didier Gomes da Rosa yatwaye igikombe cya shampiyina mu 2013 yungirijwe na Nzarora Marcel.Uyu munyezamu wigeze no guhamagarwa mu ikipe y’igihugu yaje kubura umwanya ubanza mu kibuga wafashwe na Ndayishimiye Eric “Bakame” wari uvuye muri APR FC.

Nyuma y’imyaka itatu muri Rayon Sports, amasezerano ye yarangiye mu 2015 ntiyongerwa nkuko yabibwiye abafana muri Nyakanga abasubiza ku makuru yavugwaga ko yasinye muri Musanze FC.

Bikorimana yagize ati “ [Abafana] Mwe mushobora kuba mwumva ko nkenewe hari abatabishaka, nta biganiro turagirana [na Rayon Sports] ariko niyo byaba byahera ku mafaranga bamfitiye kuko n’ibyaba bataranyishyura n’ayambere sinzi uko byaba bimeze.”

gerardbikorimana

Bikorimana Gérard ( ubururu) ari kumwe na Ndayishimiye Eric Bakame wamwicaje muri Rayon Sports

Kuri uyu wa Kabiri, Bikorimana yasezeye ku bafana babanye imyaka itatu ababwira ko agiye muri Bugesera FC, ikipe yazamutse mu cyiciro cya mbere itwaye igikombe Rwamagana FC iyitsinze ibitego 2-0.

Yagize ati “ Nejejwe no gusezera ku bafana ba Rayon Sports, ni ukuri ni iby’agaciro kuko mu gihe cy’imyaka itatu twamaranye twabanye neza cyane, muzakomeze mukunde ikipe yanyu mu bihe byiza n’ibibi.”

Yakomeje agira ati “ Ubu nerekeje muri Bugesera FC ariko tuzahura cyane haba mu kibuga no hanze yacyo, tuzagire Fairplay nk’abakunzi b’imikino, mbifurije gukomeza gutwara ibikombe byinshi. Byeeee.”

Kuba Bikorimana Gerard avuye muri Rayon Sports, bivuze ko muri iyi kipe hasigayemo Uwambazimana Leon wari mu batwaye igikombe cya shampiyona mu 2013.

Muri uyu mwaka w’imikino, Rayon Sports yatakaje Usengimana Faustin na Bizimana Djihad bagiye muri APR FC, Ndatimana Robert na Muganza Isaac muri Police FC, Ndayisenga Fuad na Hategekimana Aphrodis muri Sofapaka ya Kenya naho Nizigiyimana Kharim na Sibomana Abuba muri Gor Mahia ya Kenya.

Bakame, Kanamugire Moses na Uwambazimana nibo bongereye amasezerano.

Tanga igitekerezo na Facebook

Tanga igitekerezo