Usengimana Danny wemeza ko atasinyiye Sigida United ashobora kwerekeza muri Maroc

Yanditswe na Rwanda Football ku wa 18.04.2017 saa 08:17 | Yasuwe : 52

Rutahizamu w’ikipe y’igihugu Amavubi na Police FC, Usengimana Danny yahakanye yivuye inyuma amakuru yavugaga ko yamaze gusinyira ikipe yo muri Tanzania imyaka ibiri ahubwo avuga ko bishoboka ko yakwerekeza mu ikipe ya kure y’Akarere ka Afurika y’u Burasirazuba ahari shampiyona zikomeye.

Bimaze iminsi bivugwa mu itangazamakuru  ko Usengimana Danny  yamaze kwerekeza muri Singida United, ikipe yo muri Tanzania yazamutse uyu mwaka mu cyiciro cya mbere, gusa kuri uyu wa Gatandatu nyuma y’umukino wa shampiyona Police FC imaze kunyagira Pepiniere FC 4-1, uyu mukinnyi yarabihakanye avuga ko hari amakipe menshi amushaka ariko ntayo aremerera.

Usengimana Danny avuga ko ashobora kuguma muri Police FC nubwo hari amakipe menshi amwifuza

Yagize ati “Hari amakipe menshi arimo kuza akancaho nkabohereza ku bayobozi ariko sinavuga ngo ni iyi ngiyi bidasubirwaho nzajyamo kuko sindamenya ibyo bavugana n’abayobozi, nibamara kumvikana ni bwo bazaza nanjye nkareba niba nayajyamo.”

Abajijwe amakipe arimo kuganira na yo yavuze ko harimo iyo muri Maroc, iyo muri Tanzania n’indi yo muri Kenya ya Leopards.Ku byavugwaga ko yamaze gushyira umukono ku masezerano y’imyaka ibiri muri Singida United Danny yagize ati “Nta kintu turumvikana ndetse sindanashyira umukono ku masezerano. Barimo kuvugana na Police FC ntegereje ibizavamo, nzareba niba ari ngombwa mbe najyayo.”

Uyu mukinnyi watsinze ibitego byinshi muri shampiyona y’u Rwanda umwaka ushize (17) ndetse n’ubu akaba ari we uyoboye ba rutahizamu n’ibitego 15, yashimangiye ko yifuza gusohoka mu Rwanda akajya hanze gusa intego ye ari ukujya kure y’Akarere ahari amashampiyona akomeye nubwo no muri Tanzania ashobora kujyayo nk’inzira yo kujya ahandi.

Danny wageze muri Police FC mu myaka ibiri ishize avuye mu Isonga FC, mu ntangiriro z’uyu mwaka w’imikino yongereyemo amasezerano y’indi myaka ibiri ari na yo mpamvu avuga ko bishoboka ko yazanayigumamo n’umwaka utaha kuko ari ikipe yagiriyemo ibihe byiza kandi n’ubu nta kibazo afite.

Tanga igitekerezo na Facebook

Tanga igitekerezo