Umuyobozi wa FERWAFA yavuze ko atazi impamvu Blatter yeguye

Vincent de Gaulle Nzamwita umuyobozi w’ishyirahamwe ry’umupira w’amaguru mu Rwanda yatangarije Televiziyo y’u Rwanda ko inkuru yo kwegura kwa Sepp Blatter ari inkuru mbi ku mupira w’amaguru muri Africa, ndetse we ko ubu atazi impamvu y’iyegura rya Blatter.

Blatter w’imyaka 79 ubwo yavugaga iby’ubwegure bwe kuwa kabiri, yavuze ko yeguye kuko yabonye ko adashyigikiwe na bose mu nzego z’umupira w’amaguru, hari nyuma y’iminsi ine gusa atorewe mandat ya gatanu yo kuyobora umupira w’amaguru ku Isi, kuva mu 1998.

Blatter yeguye nyuma y’igitutu ku by’ikirego gishya cya ruswa bashinjwa gufata, cyari kimaze kugera mu rukiko rw’i Brooklyn muri New York, kimugarukagaho we n’umunyabanga we Jérôme Valcke.

NzamwitaFIFA

Vincent de Gaulle Nzamwita uyobora FERWAFA yatangaje ko kugeza ubu atazi impamvu Sepp Blatter yeguye bityo ntacyo yabivugaho kirenzeho mu itangazamakuru, ngo ni ugutegereza ibizatangazwa.Gusa avuga ko kwegura kwa Blatter ari inkuru mbi ku mupira w’amaguru muri Africa.

Ababona ibintu ugutandukanye n’uku ariko bavuga ko Blatter yari akwiye kwegura kubera ruswa yamunze umupira w’amaguru ku Isi kuva mu mpuzamashyirahamwe yayo FIFA kugera mu mashyirahamwe yayo menshi.

Itangazamakuru mu Rwanda ryagiye rigaragaraza bimwe mu bimenyetso kuri ruswa ivugwa, nibura, mu mikino ya shampionat mu Rwanda cyane cyane iyo igeze mu mpera, FERWAFA ariko kenshi yagiye ivuga ko nta bimenyetso bifatika bigaragara.

Usibye mu Rwanda, mu mpuzamashyirahamwe y’umupira w’amaguru muri Africa naho havugwa kenshi ruswa mu mikino mpuzamahanga y’ibihugu, ruswa ihabwa abasifuzi ngo babogamire uruhande runaka, ruswa itangwa n’ibihugu ngo byakire amarushanwa runaka kumanuka kugera ku bintu bito nkenerwa mu mupira w’amaguru.

‘Scandals’ za ruswa mu mupira w’amaguru zisa n’iziri kujya ku karubanda bihereye hejuru muri FIFA, nubwo bwose yashyizeho urukuta rutandukanye umupira w’amaguru n’inzego bwite za Leta zibujijwe kwivanga mu by’umupira.

Tanga igitekerezo na Facebook

Tanga igitekerezo