Umuyobozi wa Ferwafa yahuye n’amakipe y’icyiciro cya Kabiri

Yanditswe na Admin ku wa 27.11.2014 saa 15:05 | Yasuwe : 736

Ubuyobozi bw’ishyirahamwe ry’umupira w’amaguru mu Rwanda, FERWAFA bwahuye n’abayobozi b’amakipe y’icyiciro cya Kabiri kuri uyu wa Kane mu nama yabereye ku cyicaro cyayo gikuru I Remera.

Iyi nama yari iyobowe na Perezida wa Ferwafa, Bwana Vincent Nzamwita yize ku bintu bibiri aribyo ; Ubuzima gatozi bw’amakipe hamwe n’imyaka y’abakinnyi b’icyiciro cya kabiri.

Iyi nama kandi yari yitabiriwe n’Umunyamabanga Uhoraho muri Ministeri ya Siporo n’Umuco, Bwana Edward Kalisa.Nzamwita yatangiye ashimira abitabiriye inama, ahita aha umwanya Umunyamabanga Uhoraho muri MINISPOC kugira icyo ageza ku bitabiriye inama.

Kalisa yatangiye ashimira abayobozi b’amakipe y’icyiciro cya kabiri uburyo bakora n’ubwitange bagira n’ubwo bahura n’ibibazo byinshi; ibyo bigaragaza ko haba harimo ubushake no gukunda umupira w’amaguru.Kalisa yabasabye gukomereza aho kuko bitanga umusaruro bitewe n’uko icyiciro cya kabiri (D2) ariryo rerero ry’icyiciro cya mbere (D1).

Nyuma yigihe kinini baganira ku ngingo z’inama, abagize iyi nama bemeje ibi bikurikira :

Ku buzima gatozi, Umuyobozi wa Ferwafa yabamenyesheje ko amakipe y’icyiciro cya mbere yahawe itegeko ko atazakina shampiyona adafite ubuzima gatozi, ibyo rero bikaba bireba n’amakipe y’icyiciro cya kabiri.

‘Nta kipe izakina Shampiyona idafite ubuzima gatozi bw’agateganyo cyangwa nibura ibaruwa igaragara ko yakiriwe na RGB (Pour reception),’

ferwafahq

Ku myaka y’abakinnyi bagomba kwitabira icyiciro cya kabiri, umuyobozi wa Ferwafayasobanuriye abari mu nama ko FERWAFA ibabazwa no kubona uburyo amakipe y’icyiciro cya kabiri aruha no kutagira ubushobozi, amwe muri yo akava mu marushanwa kubera ubushobozi.

Ni muri urwo rwego, ubuyobozi bwa FERWAFA bwegereye MINISPOC, bubasobanurira uburyo DIV. 2 ifite ikibazo cy’amikoro, no kutagira umuterankunga. MINISPOC yemeye kuba yatera inkunga icyiciro cya kabiri, amakipe aramutse yemeye gukinisha abana batarengeje imyaka 20, agakinisha abakinnyi 3 gusa barengeje iyo myaka.

Umuyobozi wa Ferwafa yababwiye ko byaba byiza amakipe yemeye iyo gahunda kuko bazasanga bunguka cyane.

Nyuma yo kungurana ibitekerezo no gutora ku bwiganze bw’amajwi (16 batoye yego, 4 batora oya), Inama yemeje gahunda yatanzwe na MINISPOC.

Ku rutonde rw’abakinnyi 30 ikipe izatanga, 27 bazaba batarengeje imyaka 20, abandi 3 bazaba barengeje iyo myaka.

Amakipe yitabiriye iyi nama ni; Gasabo United, AS Muhanga, Intare, Etoile de L’est, Pepiniere FC, Bugesera FC, Vision JN, Sorwathe, UNR, United Stars, La Jeunesse, Vision FC, Aspor, AJSK Esperance, Interforce FC, Unity Sports Club, SEC Academy, Rwamagana City, Kirehe Fc na Akagera Fc.

Tanga igitekerezo na Facebook

Tanga igitekerezo