Umuyobozi wa CAF Ahmad Ahmad arasura u Rwanda

Yanditswe na Rwanda Football ku wa 09.03.2018 saa 12:12 |

Umuyobozi mushya w’impuzamashyirahamwe y’umupira w’amaguru muri Africa ‘CAF’ Ahmad Ahmad afite uruzinduko rw’iminsi itatu mu Rwanda ku nshuro ya mbere kuva atowe mu mpera z’icyi cyumweru..

Umunya-Madagascar Ahmad Ahmad amaze umwaka CAF kuko yatorewe kuyobora umupira w’amaguru w’ibihugu 56 bya Afurika tariki 16 Werurwe 2017. Nyuma yo gutorwa yasuye ibihugu bitandukanye ariko yari ataragera mu karere ka Afurika y’Uburasirazuba.

Ahmad Ahmad

Uyu muyobozi w’imyaka 58 biteganyijwe ko agera mu Rwanda kuri uyu wa gatandatu tariki 10 Werurwe 2018 nkuko yabyemeje mu nama ya Afurika yiga ku iterambere ry’umupira w’amaguru w’abagore yari imaze iminsi ibiri ibera muri Maroc.

Ku cyumweru mu gitondo azasura urwibutso rwa Jenoside yakorewe Abatutsi mu Rwanda 1994 ari kumwe Hédi Hamel ushinzwe itangazamakuru n’itumanaho muri CAF.

Nyuma ya saa sita azasura ibiro by’ishyirahamwe ry’umupira w’amaguru mu Rwanda ‘FERWAFA’ agirane ibiganiro n’umuyobozi waryo Nzamwita Vincent De Gaulle.

Ahmad azasoza uruzinduko rwe mu Rwanda kuwa mbere tariki 12 Werurwe 2018 yitabira inama y’umuryango w’ubumwe bwa Afurika yiga ku iterambere ry’itangazamakuru (African Union of Broadcasting).

Tanga igitekerezo na Facebook

Tanga igitekerezo

Powered by Live Score & Live Score App