Umutoza w’APR FC Ljubomir Petrović yisubiriye iwabo

Uwari umutoza w’APR Dr Ljubomir Petrović bita Ljupko  yamaze kwisubirira iwabo.Umuvugizi w’ikipe ya APR FC, Gatete George yatangaje ko uwo mutoza bamubara nk’umuntu watorotse, kuko kugeza ubu bataramenya aho aherereye.

Yagize ati “ejo ku mukino twari dufite, twaramutegereje turamubura. Ariko kuwa Gatandatu yari ahari ntabwo yigeze atubwira ikibazo afite. Gusa icyo numvaga avuga ni uko hari utubazo ashaka gukemura we ku giti cye, ariko nta kindi aratubwira”.George avuga ko ikibazo uwo mutoza afite batakizi ati “icyakabaye ari ukuri n’uko yaba yarakitubwiye tukagikurikirana, ariko ntacyo twari tuzi”.

petrovic

Ubu APR FC itegereje urwandiko rw’uwo mutoza ufatwa nk’uwatorotse, aho umuvugizi agira ati “turamubara nk’umutoza watorotse akazi, kuko atarimo gukora inshingano ze. Tubonanye nawe tukaganira nawe nibwo twabimenya, kuko ataratwandikira cyangwa ngo natwe tumusezerere”.

Ku ruhande rwa APR FC ngo nta kibazo yari imufiteho, kuko yatsindaga, ati “twumvaga nta kibazo na kimwe tumufiteho”.Gatete atangaza ko nta kintu na kimwe atahawe n’ikipe yaba yarabuze ku buryo yafata umwanzuro wo kubura.

Ubuyobozi bw’ikipe ya APR FC bwagerageje kuvugana n’uwo mutoza ku murongo wa telefone, ariko basanga utabasha kuboneka.Dr Petrovic yari yitezwe ko yatoza umukino APR FC yakinnye na Etincelles ku Cyumweru tariki ya 9 Gashyantare 2015, ariko ntabwo yagaragaye.

Ljubomir Petrovic ukomoka muri Serbia yageze mu Rwanda tariki ya 3 Kanama 2014, aho yaje asimbura Andreas Spier.

Tanga igitekerezo na Facebook

Tanga igitekerezo