Umutoza w’Amavubi McKinstry yahawe amasezerano y’umwaka

Umutoza mushya w’ikipe y’igihugu y’umupira w’amaguru ari we Jonathan McKinstry watangiye gutoza Amavubi yahawe amasezerano y’umwaka ushobora kongerwa.

Mu kiganiro n’itangazamakuru ,Nzamwitwa Vincent Degaule, Umuyobozi w’Ishyirahamwe ry’umupira w’amaguru mu Rwanda (FERWAFA) avuga ko babaye bamuhaye umwaka kugira ngo azabanze kwitabira imikino Nyafurika y’abakinnyi bakina muri shampiyona yabo (CHAN) izabera mu Rwanda umwaka utaha.

Umuyobozi wa FERWAFA avuga ko Lee Johnson umuyobozi ushinzwe tekinike wari wahamagaye ikipe y’igihugu yatangiye imyitozo ahise ayiha umutoza mukuru.Jonathan  McKinstry avuga ko yishimiye gutoza Amavubi kandi ko yizeye kwitwara neza afatanyije n’abandi.

McKinstry ukomoka muri Irlande du Nord  w’imyaka 29 y’amavuko yavuze ko afite uburambe mu gutoza buhagije kugira ngo abe yakwitwara neza mu ikipe y’Amavubi.

jonathan2

Nzamwita avuga ko bafite umutoza ufite ejo hazaza kimwe n’abakinnyi atoza ko bakiri bato.Yagize ati “njyewe nagendeye ku bo twari twashyizeho kandi sinabavuguruza”.

McKinstry yavuze ko umupira w’amaguru ari ukwishimisha, ariko bazi neza ko bagomba gushaka instinzi kandi bazahera ku mukino Amavubi azakina na Zambia. Uyu mutoza ahise atangira imyitozo y’Amavubi yitegura umukino wa gishuti bagomba gukina na Zambia.

Amavubi azakina umukino wa gishuti na Zambia tariki ya 29 Werurwe 2015. Uyu mutoza ukomoka muri Irland yakoze mu bihugu bitandukanye nka Sierra Leone ari nayo yaherukaga gutoza. Abifuzaga gutoza Amavubi bari abatoza bagera kuri 42 aribo bifuje kuyitoza.

McKinstry agiye gutoza Amavubi asimbuye Stephen Constantine uherutse gusezera kuri uwo mwanya muri Mutarama uyu mwaka. Kuri ubu Amavubi ari ku mwanya wa 62 ku isi ku rutonde ngarukakwezi rwa FIFA.

Tanga igitekerezo na Facebook

Tanga igitekerezo