Umutoza wa Pépinière FC agiye kwiga gutoza abana mu Budage

Yanditswe na Admin ku wa 11.08.2017 saa 17:07 | Yasuwe : 70

Umutoza wari usanzwe yungirije mu ikipe ya Pépinière FC yamanutse mu cyiciro cya kabiri, Rwibutso Claver, yatsindiye kuzajya kwiga gutoza abana mu Budage.

Rwibutso urangije kwiga siporo muri Kaminuza y’u Rwanda, Koleji y’uburezi yatoranyijwe mu Banyarwanda 53 bari basabye kuzajya kwiga ibijyanye n’ubutoza by’umwihariko abana mu Budage nk’uko Umuvugizi wa Ferwafa, Ruboneza Prosper yabitangaje.Yagize ati “Abadage basabye ko ababishaka bakwandika basaba kujya kwiga ibijyanye n’ubutoza. Hari hasabye abagera kuri 53 batoranya Rwibutso gusa ntabwo tuzi icyo bagendeyeho nta ruhare twagizemo.”

Uyu mutoza nawe yatangaje ko ari amahirwe yagize kuba ariwe watoranyijwe, agasanga bizamufasha kugera ku nzozi afite zo gufasha abana kuzgaragaza impano zabo.Yagize ati “Twasabye turi benshi, ntabwo wamenya icyo bagendeyeho batoranya.”

Uyu mutoza wafatanyaga kungiriza muri Pépinière FC no gutoza abana muri Agaciro Football Training Center i Remera, yakomeje agira ati “Ni amahirwe kuri njye wabashije gufatwa kuko bizatuma niyungura ubumenyi mu gutoza abana kandi n’iyo najya mu ikipe nkuru nk’uko nari nungirije muri Pépinière FC ntibyambuza no gutoza abana kuko ni ibintu nkunda.”

Biteganyijwe ko Rwibutso wari mu batoza baherutse gusoza amahugurwa yo ku rwego rwa C ya CAF (Licence C) yabereye mu Rwanda, azahaguruka i Kigali kuwa 19 Kanama yerekeza i Frankfurt Rhine-Main mu Budage aho azamara ibyumweru bitatu.

Mu gihe Pépinière FC Rwibutso yatozagamo yungirije yamaze kumanuka mu cyiciro cya kabiri, uyu mutoza ari ku rutonde rw’abahabwa amahirwe menshi yo kuzajya kungiriza Kanyankore Gilbert Yaoundé muri Bugesera FC.

Tanga igitekerezo na Facebook

Tanga igitekerezo