Umutoza Antoine Hey yatandukanye n’ikipe y’igihugu Amavubi

Yanditswe na Rwanda Football ku wa 25.01.2018 saa 14:57

Umutoza Antoine Hey yasezeye mu ikipe y’Amavubi akaba yahisemo guhagarika amasezerano ye y’akazi kugeza igihe hazatorerwa ubuyobozi bushya bwa FERWAFA kugira ngo bumwongerere amasezerano.

Abinyujije ku rubuga rwe rwa Twitter, Antoine Hey yatangaje ko yamaze gutandukana n’ikipe y’igihugu Amavubi yatozaga

Antoine Hey yasezeye mu Mavubi akoresheje Twitter

Kuwa gatatu tariki ya 24 Mutarama, 2017 Antoine Hey yagiranye ibiganiro na Perezida wa FERWAFA Nzamwita Degaule Vincent aho bumvikanye kurangiza amasezerano bari bafitanye.Abinyujije kuri Twitter, Antoine Hey yashimiye abakinnyi yatozaga ndetse anatangaza ko atakiri umutoza w’Amavubi.

Perezida wa FERWAFA Nzamwita ati “Twumvikanye ko amasezerano arangira kugera habonetse ubuyobozi bushya bwa FERWAFA. Ubuyobozi bushya nibwo buzafata umwanzuro wo kongera cyangwa kutongera amasezerano.”

Antoine Hey asezeye nyuma yo gusezererwa na Libya muri Chan 2018

Yakomeje ashima umutoza wakoze uko ashoboye mu gihe cyose yari amaranye n’ikipe y’igihugu Amavubi. Ati “Mu mwaka umwe amaranye natwe, yubatse ikipe y’igihugu ikomeye twizeye ko akomeje kuyitoza twazagira ikipe ikomeye. Mu gihe tugitegereje ko ubuyobozi bushya butorwa, ngo bufate umwanzuro wa nyuma ku masezerano ye, icyo twifuza ni uko yakomeza kuba atoza u Rwanda kugira ngo akomeze gushyira mu bikorwa ibyo yatangiye kubaka mu mwaka ushize.”

Umutoza Antoine Hey yanditse ku rukuta rwa Twitter amagambo ati “Byari iby’icyubahiro kuba umutoza mukuru w’Amavubi. Imikoranire na FERWAFA, Minisiteri ya Siporo, abakizi banjye mu rwego Tekinike n’abakinnyi bacu yari myiza.

Ubutumwa Antoine Hey yashyize kuri Twitter

Twagiranye ibihe bizahoraho iteka, rimwe na rimwe byari ibyishimo, ubundi amarira. Nagira ngo nshimire abafana bacu bose n’inshuti kubwo kutwizera ndetse no kudutera akanyabugabo muri uru rugendo rwacu.

Ndashimira by’umwihariko ikipe yanjye. Mwambereye beza! Kandi mbiseguyeho ko tutabashije kugera ku nzozi zacu! (amasegonda gusa)”Ntawe uzi icyo ejo hazaza hatubikiye, ariko wenda umunsi umwe tuzongera duhure. Naje nk’Umunyamahanga ariko ngiye nk’inshuti, Imana ibahe umugisha mwese. Byari iby’icyubahiro! Amavubi”

Ferwafa yahise imusubiza

Nyuma yo kunganya na Guinea Equatorial umutoza Antoine yari yabajijwe niba ashobora kuzajya gutoza muri Syria amaze asubiza ati :” Ni byo Syria yaranyegereye bambaza niba naboneka, bananyeretse amasezerano ariko nababwiye ko nkiri mu irushanwa hagati ko tuzavugana ubwo CHAN izaba isojwe”.

Antoine Hey asoje amasezerano n’Amavubi nta kintu kigaragara agezeho kuko mu irushanwa rya CECAFA yakinnye yaviriyemo mu matsinda, muri CHAN 2018 nayo aherutse kuviramo mu matsinda, ndetse no mu mikino yo gushaka itike y’igikombe cya Africa “AFCON 2019″ yatsinzwe umukino wa mbere yakinnye.

Hey ngo agomba gutegereza ko FERWAFA ibona abayobozi bashya babaka aribo bazafata umwanzuro kuri ejo hazaza he mu ikipe y’igihugu Amavubi.

Amatora ya kabiri y”abayobozi ba FERWAFA agomba guba ku itariki 31 Werurwe 2018 kuko ayambere yabaye mu mpera z’umwaka ushize yasoje umukandida umwe rukumbi wari usigayemo nyuma yo kwegura kwa Nzamwita Vincent atabonye ubwiganze bw’amajwi ahagije amuha intebe ya FERWAFA.

Tanga igitekerezo

Tanga igitekerezo