Umutoza Andy Mfutila yirukanywe muri Rayon Sports

Yanditswe na Admin ku wa 03.02.2015 saa 08:29 | Yasuwe : 549

Uwari umutoza wa Rayon Sports  Andy Mfutila Magloire yasezerewe kubera umusaruro mucye nyuma y’amezi atatu  mu mikino 10 atabonyemo intsinzi

 Uwari umutoza wungirije Habimana Sosthene akaba ari we mutoza w’agateganyo lu gihe hataraboneka usimbura Mfutila.

Umuyobozi wa Rayon Sports Ntampaka Theogene yemeje amakuru ko Mfutila atakiri umutoza wabo yasezerewe kubera umusaruro mucye.Yagize ati ” Mfutila ntakiri umutoza wacu kubera umusaruro mubi, turi mu biganiro nawe kugira ngo turangizanye mu bwumvikane.”

Tariki ya 15 Ugushyingo 2014 nibwo ubuyobozi bwa Rayon Sports bwemeje ko Mfutila ariwe mutoza mukuru anasinya  amasezerano y’umwaka umwe.

mfutila

Ku mukino wa mbere yatoje yanganyije na Kiyovu Sports ibitego 2-2, uwa kabiri yasubiye muri Congo gushaka abakinnyi maze Rayon Sports inganya na Sunrise i Rwamagana.

Byahumiye ku murari ubwo banganya n’Amagaju igitego 1-1 i Nyamagabe ku mukino ubanza w’imikino yo kwishyura ya shampiyona, Mfutila yari yujuje imikino umunani nta ntsinzi.

Imikino ibiri ya nyuma ya Mfutila nk’umutoza wa Rayon Sports yasezerewe mu irushanwa rya Prudence nyuma yo gutsindwa kuri penaliti na Police FC.

Umukino wa cumi nta ntsinzi Rayon Sports yongeye gutsindwa kuri penaliti na AS Kigali kuri iki Cyumweru kuri stade Amahoro.

Mu mikino 10 Rayon Sports yakinnye nyuma y’aho Mfutila abaye umutoza yanganyije imikino itandatu ya shampiyona (Kiyovu Sports, Sunrise, Marines, Police FC, Mukura VS n’Amagaju) atsindwa na AS Kigali.

Rayon Sports yasezerewe na Police FC mu irushanwa ryo kurwanya ruswa ndetse yongera kuyisezerera mu irushanwa rya Prudence kimwe na AS kigali mu guhatanira umwanya wa gatatu.

Mfutila afite impamyabumenyi y’ubutoza yo mu rwego rwa A yakuye i Clairefontaine mu Bufaransa yamenyekanye mu makipe nka Tout puissant Mazembe, Saint Eloi Lupopo, APR FC, AS Vita club ndetse n’ikipe ya Repubulika Iharanira Demokarasi ya Congo yakinnye igikombe cy’Afurika mu 2004.

Tanga igitekerezo na Facebook

Tanga igitekerezo