Umusifuzi yishwe n’umutima mu kibuga muri Bolivia

Yanditswe na Rwanda Football ku wa 20.05.2019 saa 14:16

Umusifuzi ukomoka mu gihugu cya Bolivia witwa Victor Hugo Hurtado yituye hasi ubwo yarimo ayobora umukino w’icyiciro cya mbere muri iki gihugu,ahita apfa.

Ubwo Victor yarimo ayobora umukino wahuzaga ikipe yitwa Always Ready na Oriente Petrolero ku kibuga cyitwa Municipal Stadium giherereye ahitwa El Alto, yaje kwikubita hasi arahwera ku munota wa 47,abaganga b’amakipe yombi barahurura kugira ngo bamutabare ariko yageze kwa muganga yapfuye.

Kubera ko iyi stade amakipe yombi yakiniragaho iri ku butumburuke bwa metero ibihumbi 3,900 hejuru y’inyanja,byatumye uyu musifuzi afatwa n’umutima ari mu kazi bimuviramo urupfu.

Ubwo Victor yagwaga mu kibuga, abakinnyi b’impande zombi n’abaganga bose bageragaje kumufasha biranga,bahita bamwuriza ambulance yo kumujyana ku bitaro yaguyemo.

Umuganga w’ikipe ya Always Ready witwa Eric Kosziner yavuze ko uyu musifuzi yishwe n’umutima kuko ngo nyuma yo guhabwa ubufasha bwibanze ku kibuga yahise ajyanwa kwa muganga urongera uramurembya cyane bimuviramo urupfu.

Tanga igitekerezo