Umunsi wa 22 : Mukura yatsinze Amagaju,Espoir itsinda Kiyovu

Yanditswe na Admin ku wa 05.04.2015 saa 23:53 | Yasuwe : 812

Ibitego bibiri bya Cyiza Hussein bitumye ikipe ya Mukura itangira kugenda isohoka mu murongo utukura nyuma yo gutsindira Amagaju i Nyamagabe 2-1 mu mukino w’umunsi wa 22 wakinwaga kuri uyu wa gatandatu.

Ikipe ya Mukura irahatanira kutabarizwa mu makipe abiri ya nyuma agomba kumanuka ku rutonde rwa shampiyona aho yamaze gutangira kwizera kurokoka nyuma yo gutsinda Amagaju ikaguma kumwanya wa 11 n’ amanota 24 mu mikino 22 imaze gukina.

Ni umukino wari watangajwemo byinshi mbere yuko ukinwa, aho byavugwaga ko ikipe y’Amagaju biciye mu buyobozi bwayo, ishobora guharira Mukura uyu mukino kugirango itazamanuka mu cyiciro cya kabiri, nkuko na Mukura yari yayifashije mu mwaka wa shampiyona ushize.

Nubwo mu mukino hagati nta kintu kinini cyagaragazaga ko hari ukumvikana ku makipe yombi, cyane ko binagoye kubihamya, abakinnyi iyi kipe y’i Nyamagabe yabanje mu kibuga, basize akabazo ku bakunzi ba ruhago nyarwanda.

 

mukura15

 

Amagaju yagiye gukina adafite abakinnyi bayo batatu beza muri uyu mwaka wa shampiyona Alanga Yenga Joachim, Mumbere Saiba Claude ndetse byumwihariko Muhindo Jean Pierre wari umaze gutsinda kimwe cya kabiri cy’ibitego byose Amagaju yatsinze uyu mwaka, aho ikipe yose ya Mukura yamurushaga ibitego bitatu gusa.

Abajijwe ku ibura ry’aba bakinnyi, umutoza w’Amagaju Bizimana Abdu Bekeni yatangaje ko impamvu batabonetse ari uko hari ibyo ikipe yari ibarimo itabemereye. Abajijwe impamvu babuze ari uko umukino wa Mukura ugeze, Bekeni yatangaje ko habayeho uruhurirane gusa ko ibura ryabo ari ryo ryatumye batsindwa.

“Icyo nakwemeza ni uko iyo tuba dufite abo bakinnyi batatu, Mukura itari budutsinde. Ntabwo barwaye nta nikindi kibazo bafite, ibyinshi kuri bo mwabibaza komite”. Uyu mutoza ariko akaba atigeze yegura nkuko yari yabitangaje.

Cyiza Hussein yaje kungukira ku makosa y’umunyezamu Rukundo Protegene maze atsinda igitego cya mbere ku munota wa 48 mu gihe yaje no gutsinda icya kabiri nyuma y’iminota itanu. Amagaju yaje gutsinda impozamarira mu minota yanyuma ku gitego cya Mudeyi Ngiriyeze Abdoul.

Mu yindi mikino yabaye, Kiyovu Sports yatsindiwe i Rusizi na Espoir 2-1, Ikipe ya AS Kigali iraye kumwanya wa mbere nyuma yo gukura amanota atatu i Rubavu ihatsindiye Etincelles ibitego 3-2 naho POLICE FC itsinda Isonga ibitego 2-1.

Ikipe ya Espoir FC na Gicumbi FC nizo kipe mu Rwanda uyu mwaka zimaze kwerekana ko zidatinya aya makipe yibigugu aho zahangamuye Rayon Sports, APR FC ndetse na Kiyovu ikaba yaje mu mubare kuko Espoir nyuma yo kunganya na Rayon Sports kuri Kamarampaka, yahatsindiye APR FC none ikurikije Kiyovu.

Uko imikino y’umunsi wa 22 wa shampiyona yagenze:

Etincelles 2-3 As Kigali

Espoir FC 2-1 Kiyovu Sports

Musanze FC 1-0 Marines FC

Isonga FC 1-2 Police FC

Amagaju FC 1-2 Mukura VS

– See more at: http://www.rwandasport.com/amakuru-mashya/mukura-twaje-mutwitege-niyo-ndirimbo-espoir-ikomeje-guhangamura-ibigugu.html#.VSecIeEcYlE

Tanga igitekerezo na Facebook

Tanga igitekerezo