Umunsi wa 20 : Espoir yatsinze APR bikurura imvururu

Yanditswe na Admin ku wa 20.03.2015 saa 10:51 | Yasuwe : 714

Mu mukino w’umunsi wa 20 wa Shampiyona ku kibuga cya Rusizi   ikipe ya Espoir FC  yari yakiriye ikipe ya APR FC iyitsinda igitego kimwe ku busa,

Uyu mukino ukirangira wakurikiwe n’amahane yadutse mu kibuga nyuma y’uko umutoza Mashami na bamwe mu bakinnyi b’APR FC batishimiye imisifurire ya Issa Kagabo na bagenzi be.

Igitego cya Espoir cyabonetse ku munota wa 55 gitsinzwe neza n’umukinnyi Jean Damascene Habimana (Gisimba) kuri koruneri nziza yijyanyemo.

Amakuru ava Rusizi  avuga ko byatangiye kare ubwo umukinnyi Mugiraneza Jean Baptiste (Migi) yahawe ikarita itukura mu gice cya mbere nyuma yo gukubita inkokora ku bushake umukinnyi wa Espoir ubwo bari bagiye gutera koruneri, maze umusifuzi wo ku ruhande Dieudonné ahita yereka Issa Kagabo ibyo Migi akoze ahita amuha ikarita itukura.

Imyitwarire y’abakinnyi b’APR FC muri uyu mukino  yatangaje abantu benshi cyane mu kibuga dore guhera ubwo  guhera mu mukino hagati bakomeje kugaragaza kutishimira ibyemezo by’umusifuzi nawe utagiye azuyaza kubaha amakarita. Abakinnyi nka Iranzi, Rugwiro Hervé, Rusheshangoga Michel ni bamwe mu bahawe amakarita y’imihondo.

mashamiespoir

Umukinnyi Yannick Mukunzi we ntiyishimiye ikosa yakoze bakamusifura maze akubita umupira hasi n’uburakari bwinshi imbere y’umusifuzi ahita amuha ikarita y’umuhondo.

Mu gihe abakinnyi ba Espoir FC birukankiraga mu kibuga bishimira intsinzi umukino urangiye, Umutoza wa APR FC Mashami Vincent   yasatiriye umusifuzi Issa Kagabo ashaka kumusagarira maze abapolisi  bamwitambika imbere bituma Mashami arwana n’abapolisi.Abakinnyi Rugwiro Hervé na Ndahinduka Michel nabo bahise binjira mu mvururu nibwo Polisi yakoresheje imbaraga.

Ikipe ya Espoir yiteguye kuri uyu wa kane tariki 19.03.2015 kwandikira Ishyirahamwe ry’umupira w’amaguru mu Rwanda ibagezaho ikirego cy’imvururu zatejwe n’ikipe yabasuye  inagaragariza FERWAFA amazina ya bagashozamvururu muri ibi bikorwa bigayitse.

Imvururu nkizi zaherukaga tariki ya 20 Mata 2014 ubwo ikipe ya Rayon Sports yashozaga intambara nyuma yo kunganya na As Kigali igitego 1-1, aho byaviriyemo umutoza Luc Eymael na bamwe mu bayobozi ba Rayon Sports guhagarikwa imikino umunani adatoza, abandi bagacibwa ku kibuga imikino nabo umunani badakoza ikirenge ku bibuga.

Hakaba hategerejwe niba Ferwafa iri bwongere kunyuza uyu munyafu no ku bakinnyi n’umutoza Mashami Vincent nyuma yo guhabwa raporo na komiseri w’umukino.

Tanga igitekerezo na Facebook

Tanga igitekerezo