Umukino wa Rayon Sports FC izakina na Rivers United washyizwe ku cyumweru

Yanditswe na Rwanda Football ku wa 11.04.2017 saa 17:18 | Yasuwe : 61

Kuri uyu wa kabiri Ishyirahamwe ry’Umupira w’amaguru mu Rwanda (FERWAFA) ryatangaje ko umukino w’amarushanwa ya CAF Confederation Cup Rivers United yo muri Nigeria izakiramo Rayon Sports FC uzaba ku cyumweru tariki 16 Mata.

Ni umukino ubanza uzabera mu murwa mukuru wa Leta ya ‘Rivers’ witwa Port Harcourt isaha ya saa kumi (16h00) zo muri ‘Rivers State’, hanyuma umukino wo kwishyura ukabera i Kigali nyuma y’icyumweru kimwe, ku itari 22 Mata.

FERWAFA yavuze ko yohererejwe ubutumwa n’Ishyirahamwe ry’Umupira w’Amaguru muri Nigeria ribamenyesha ko umukino uzaba uba ku cyumweru, dore ko ikipe yakiriye iba ifite uburenganzira bwo guhitamo umunsi muri Weekend iba yategetswe na CAF.

Rayon sports iyoboye urutonde rwa Shampiyona imaze iminsi yitwaye neza.

Uyu mukino ubanza wari uteganyijwe kuba muri weekend ishize ku matari ari hagati ya 07 na 09 Mata, ariko uza kwimurwa kubera ko u Rwanda rwari rwinjiye mu gihe cyo kunamira ku nshuro ya 23 abazize Jenoside yakorewe Abatutsi n’ubu bigikomeza.

Ikipe izarenga iki kiciro izahita yinjira mu kiciro cy’amatsinda, aho buri kipe ihageze ihabwa amadolari ya America 275,000.

Tanga igitekerezo na Facebook

Tanga igitekerezo