Umukino wa Kiyovu Sports na Rayon Sports mu mateka

Yanditswe na Admin ku wa 13.11.2014 saa 12:21 | Yasuwe : 828

Muri iki gihe hategerejwe umukino wo ku munsi wa munani wa shampiyona ku italiki ya 22.11.2014 uzahuza Rayon Sports na Kiyovu, twahisemo gusubiza amaso inyuma ngo turebe amateka yaranze imikino y’aya makipe yombi.

Amateka avuga ko Rayon Sports yashinzwe muri Gicurasi 1968 na Murego Donat wari Visi Perezida w’Urukiko rw’ikirenga i Nyanza akiva kwiga i Burayi. Iyi kipe yaje kwimukira i Kigali ikajya ikorera imyitozo ku Kimihurura.

Rayon Sports yaje i Kigali ihasanga Kiyovu Sport yo yashinzwe mu 1964 na Burugumesitiri Kabahizi wa komini Kiyovu ari naho ivana iri zina maze ayegereza abayisiramu ikundwa na benshi i Nyamirambo.

Rayon sports ifite ibikombe 7 bya shampiona 1975, 1981, 1997, 1998, 2002, 2004 no mu 2013 naho Kiyovu ikagira 3 gusa, 1983, 1992 yatwaye idatsinzwe umukino n’umwe n’icyo mu 1993.

Umukino wa Rayon na Kiyovu warangwaga no guhiga, ugahuruza imbaga gusa nta mvururu zakunze kugaragaramo.

Kanamugire Aloys watoje aya makipe yombi avuga ko icyumweru mbere y’umukino abafana babaga bahiga baganira kuri uyu mukino ari nako baba benshi ku myitozo.

Mu mikino 26 ya shampiona twabashije kumenya yahuje aya makipe yombi Rayon yatsinzemo 8 inganya na Kiyovu.Intsinzi y’ibitego 4-2 yabonetse inshuro 3; inshuro imwe ya Kiyovu ni iyo mu 1968,umukino wo kuya 1/10/1990 w’ibitego 3-3 niwo banganyijemo ibitego byinshi.

kiyovu_rayon

Aya makipe yombi mbere y’1994 yaranzwe no kudahana abakinnyi. Ngo byari umuziro gukinira aya makipe yombi kuko yagiraga ibibazo mu buzima, gukene,indwara n’ibindi.

Bamwe mu bakinnyi n’abatoza bakoreye muri aya amakipe yombi

Abatoza ni Aloys Kanamugire na Deo Kanamugire, naho abakinnyi ni nka Bonny Rugamba, Auxile Rutingingwa, Michel Kamanzi, Nizigiyimana Karim Makenzi, Fuadi Ndayisenga, Niyonshuti Gadi, Sibomana Hussein, Kagere Meddie, Tuyisenge Pekeyake,Habimana Mutoka,Bokota Labama na Tuyizere Donatien.

Imwe mu mikino y’amateka yaranze aya makipe


Nyuma yo kunganya igitego 1-1 mu 1968 undi mukino ugasubikwa kubera umukinnyi utari ufite ibyangombwa, kamarampaka y’ibitego 4 bya Kiyovu kuri 2 bya Rayon byambitse ikamba iyi kipe yambara icyatsi n’umweru.

Ku munsi wa nyuma wa shampiona y’1975, Rayon yatwaye igikombe kuko Kiyovu yari imaze gutsindwa na Mukura igitego kimwe ku busa maze igikombe gitaha i Nyanza mu Rukari.

Mu 1984 Kiyovu yaguze abakinnyi Muvala Valens na Tindo i Burundi hafi miliyoni 2 z’amafaranga y’u Rwanda ndetse yongeramo na Hassan Karera.

Umukino wa mbere na Rayon Sports batsinzwe ibitego 2-1 nyamara ariko muri uwo mwaka Kiyovu ntiyongeye gutsindwa. Ngo haciye imyaka isaga 5, Kiyovu Sports yiharira umukino wa Rayon sports.

Ni muri iki gihe umunyamakuru w’imikino kuri Radiyo Rwanda, Kalinda Viateur yasomye itangazo ryo kubika Rayon Sports bivugwa ko ryari ryatanzwe n’abafana ba Kiyovu Sport.Kiyovu Sports ya kapiteni Muvala Valens yashoboye kwiharira umukino wayo na Rayon Sports.

Ubwo Kiyovu Sport mu 1987 yajyaga gukina i Nyanza yagezeyo isanga yibagiwe imyenda maze bamererwa gukinana iyo babonye nkuko Munyandekwe Hussein wari rutahizamu wa Kiyovu Sports yabivuze.

Munyandekwe yagize ati “ Twageze i Nyanza dushaka imyenda turayibura maze batwemerera gukinana iyo twari dufite, benshi bakinanye amakoboyi abandi bahina ayo ampatalo bari bafite ariko biyarangiye tubatsinze igitego 1-0.”

Kuya 31 ukuboza 1989 umukino utazasibangana mu mitima n’imitwe y’abafana ba Rayon sport ubwo Kiyovu Sports yabarishaga nabi ubunani bw’1990 ku gitego kimwe ku busa cya Shabani Maneno mu izamu ryari ririnzwe na Kanyandekwe Eugene .

Ku ruhande rwa Kiyovu,gutsindwa uyu mukino wari umutego ku mutoza wa Kiyovu Kanamugire Aloys nyamara Abayovu bari bataratsindwa umukino n’umwe mu shampiyona.

Nyuma yo gutsinda uyu mukino, abakinnyi ba Kiyovu Sport bahawe amatike yo gusohokera muri Hotel yo kwa Lando dore ko ubundi bineguriraga muri Bar de l’Amitie ku Mumena.

Umukino wo kuya 01/10/1990 aya makipe yahuriye i Gitarama maze anganya ibitego 3-3.

Kuva mu 2001 Rayon Sport yakunze kuza imbere ya Kiyovu ku rutonde rwa shampiyona keretse mu 2003, igihe Kiyovu yari ku mwanya wa 2 n’amanota 31 naho Rayon ari iya 4 n’amanota 27.

Umwaka wa 2008/9 ntiwahiriye Kiyovu Sports kuko yarangije ku mwanya wa 9. Rayon Sports yabatsinze imikino yombi, uwo kwishyura Kiyovu Sports itsindwa ibitego 4-2.

Mu 2010 ubwo Kiyovu yasozaga shampiyona ku mwanya wa 2, Rayon yari ku mwanya wa gatandatu.Umukino ubanza Kiyovu yatsinze Rayon ibitego 3-2 maze abafana ba Rayon bamena inkari ku mutoza Kayiranga Baptista, ku munsi ukurikiraho tariki ya 28/3/2010 yegura ku mirimo ye.

Uyu mukino watanze isura nshya ya ruhago y’u Rwanda kuko umutoza wa Kiyovu, Jean Marie Ntagwabira yari yaguze uyu mukino, byatumye ahagarikwa imyaka 2 mu mupira w’amaguru wo mu Rwanda.
Rayon Sports yatwaye igikombe cya CECAFA 1998

Source : Rayon Sports website

Tanga igitekerezo na Facebook

Tanga igitekerezo