Umukino wa gicuti w’u Rwanda na Nigeria ntukibaye

Yanditswe na Admin ku wa 24.07.2015 saa 01:37 | Yasuwe : 785

Umukino wa gicuti wagombaga guhuza Amavubi y’abakina imbere mu gihugu n’iya Nigeria y’abatarengeje imyaka 23 wari kubera i Kigali kuri uyu wa Gatandatu ntukibaye.

Ikipe ya Nigeria U23 yagombaga kunyura mu Rwanda ijya muri Congo Brazzaville gukina umukino wo kwishyura  tariki ya 2 Kanama 2015.

 Umunyamabanga w’Ishyirahamwe ry’umupira w’amaguru mu Rwanda (FERWAFA) Mulindahabi Olivier, avuga ko Nigeria ariyo yari yabandikiye ibasaba uyu mukino wa gicuti.

Ku Cyumweru nibwo FERWAFA yibukije Nigeria kubaha gahunda y’urugendo rwabo mu Rwanda, ntibasubiza kugeza ubwo kuwa Kabiri Minisiteri y’umuco na siporo yafataga umwanzuro ko uyu mukino utakibaye.

u23rwanda

Mulindahabi yagize ati “ Ibaruwa ya Nigeria yaje kuwa Gatatu batubwira ko batagishoboye kunyura mu Rwanda ariko badusaba ko bishobotse twazakina umukino wa gicuti mu mpera za Nzeli cyangwa intangiriro z’Ukwakira.”

Umunyamabanga wa FERWAFA avuga ko babasubije babaza niba uyu mukino wabera mu Rwanda kuko ubu bari kwitegura igikombe cy’Afurika kizabera mu Rwanda, ikindi ngo ni ukubanza kumenya gahunda z’umutoza w’ikipe y’igihugu.

Amavubi akomeje umyitozo bategura umukino wa gicuti na Afurika y’Epfo i Johannesburg kuwa Kabiri, tariki ya 28 Nyakanga.

Bavuye muri Afurika y’Epfo bazakomereza mu mwiherero w’ibyumweru bibiri muri Ecosse kuva tariki ya 2 Kanama 2015.

Tanga igitekerezo na Facebook

Tanga igitekerezo