Uko shampiyona y’ u Rwanda 2014-15 yagenze mu mibare

Yanditswe na Admin ku wa 25.05.2015 saa 17:54 | Yasuwe : 1,198

Shampiyona y’ icyiciro cya mbere mu Rwanda umwaka wa 2014-15 yasojwe ikipe ya APR FC itwaye ikii gikombe ku nshuro yayo ya 15 aho ari nayo kipe imaze gutwara iki gikombe inshuro nyinshi.

Iri rushanwa ni ubwa mbere ryari rikinwe hashyizweho itegeko ryo gukinisha abanyamahanga batatu gusa mu mukino, ibi bikaba byaragize ingaruka zitandukanye aho ibitego byabaye ingume ugereranyije n’ umwaka ushize wa 2013-14.

Muri rusange, iyi shampiyona yagenze nabi kuburyo byagaragariraga buri wese wayikurikiye, haba mu mitegurire, haba mu kibuga aho urwego rw’umupira rwamanutse nubwo hakinishwaga abakinnyi benshi b’abanyarwanda ariko ntibaragera ku rwego ruhagije ngo baryoshye shampiyona.

Iyi nkuru rero tugiye kubagezaho uko iyi shampiyona yagenze mu mibare nkuko bigaragazwa n’ ibarurishamibare ry’ikinyamakru  www.rwandasport.com :

0 : NTAMUKINO UTARAKINWE

N’ubwo amakipe menshi yatakaga ikibazo cy’ amikoro, shampiyona igakinwa nta muterankunga ifite ngo amakipe abe yabona ku dufaranga, ikintu umuntu wese wakurikiranye iri rushanwa  yakwishimira ni uko ko nta mpaga yabaye muri iri rushanwa ry’ uyu mwaka aho amakipe yose yakinnye imikino yasabwaga ikarangira.

1 :  APR FC MU RUGO YIHAGAZEHO

Ikipe y’ igisirikare cy’ u Rwanda APR FC niyo kipe yatsindiwe mu rugo inshuro nkeya, rimwe gusa aho yatsinzwe na Gicumbi i Kigali igitego 1-0 mu mukino w’ umunsi wa 9 wa shampiyona igitego rukumbi cyatsinzwe n’ Uwineza Jean de Dieu.

2: RAYON YAKUBISWE NA MUKEBA AMAJYA N’ AMAZA

Amakipe ahanganye cyane mu Rwanda APR na Rayon Sports, iyo zahuye n’iyonka irabimenya. Nta mukino waya makipe ujya woroha bikongeraho ko bigorana ko ikipe imwe yatsinda indi inshuro ebyiri zikurikiranya muri shampiyona.Uyu mwaka ariko ikipe ya APR FC yashoboye cyane mucyeba Rayon Sports aho yayitsinze imikino yombi ubanza nuwo kwishyura. Ubanza APR yari yakiriye Rayon maze iyitsinda 2-1 naho uwo kwishyura Rayon inyagirwa 4-0.

ibi by’uko imwe muri iyi kipe itsindwa umukino ubanza nuwo kwishyura, byaherukaga muri  Shampiyona yo mu mwaka 2003-2004 ikipe ya APR FC yatsinze umukino ubanza 1-3 irongera itsinda uwo kwishyura 1-0, mu gihe umwaka wari wabanje 2002-2003 Rayon Sports FC yatsinze umukino ubanza 1-0 irongera itsinda mu mukino wo kwishyura 4-1.

3: Rutahizamu umwe rukumi niwe wabashije gutsinda ibitego 3 mu mukino umwe, Songa Isaie wa AS Kigali abitsinda ikipe ya Mukura VS mu mukino AS Kigali yatsinzemo 3-0 ku munsi wa 18 wa shampiyona kuri stade ya Muhanga.

4: APR FC na POLICE FC niyo makipe yatsinzwe imikino micyeya aho buri imwe yatsinzwe imikino 4.

5: Ikipe ya Rayon Sports niyo kipe rukumbi yamaze imikino itanu inganya (idatsinda cg itsindwe) muri shampiyona y’ u Rwanda uyu mwaka urangiye.

5: Intsinzi ikomeye cyane yabonetse ni ibitego 5-0 aho ikipe ya APR FC yatsinze Kiyovu 5-0 naho Rayon ikabitsinda Isonga ndetse POLICE FC nayo ikabitsinda Kiyovu Sports.

Rayon6-498x265

6: Umutoza Kayiranga Jean Baptiste yirukanwe muri Mukura VS amaze gutoza imikino 6 adatsinda numwe. yari amaze gutsindwa imikino 4 anganyije 2. Ibitego byinshi mu mukino byabaye byinshi ni 6 aho Amagaju yatsinze Espoir 5-1 i Rusizi.

7: Ikipe y’ Isonga FC yamaze imikino 7 y’ ikurikiranya itsindwa. guhera ku munsi wa gatandatu wa shampiyona kugeza ku munsi wa 12.

8: Igikuba cyaracitse ubwo Rayon yamaraga imikino 8 idatsinda muri shampiyona y’ u Rwanda.

9: Kiyovu Sports ikipe ikunzwe n’abafana batari bacyeya ntabwo bishimiye umwanya wa cyenda iyi kipe y’ umutoza Ally Bizimungu irangijeho shampiyona.

12: Gicumbi FC niyo kipe yanganyije imikino myinshi, 12.

13: Songa Isaie niwe wabaye rutahizamu w’ umwaka aho yatsinze ibitego 13.

14: Isonga FC na Etincelles FC niyo makipe yatsinzwe imikino myinshi 14 mu mikino 26 yakinnye.

15: APR FC niyo kipe yatsinze imikino myinshi 15.

15: Isonga FC yamaze imikino 15 idatsinda umukino numwe.

26: Buri kipe yakinnye imikino 26, imikino 13 ibanza na 13 yo kwishyura.

148: Amakipe yakinnye imikino yasuye yinjije ibitego 148. (Away Goals)

182: Imikino yose hamwe yakinwe ni 182.

189: Amakipe yakinnye imikino ari mu rugo yinjije ibitego 189 (home goals)

212: Shampiyona y’ u Rwanda umwaka wa 2014-15 yakinwe iminsi 212 aho yavuye ku italiki 18/10/2014 ikarangira ku itariki 17/05/2015 aho yamaze amezi 7 cyangwa se ibyumweru 30 n’ iminsi 2 cyangwa ubishyize mu masaha ni amasaha 5088.

337: Ibitego byose yatsinzwe umwaka w’ imikino ushize ni 337 aho byibura ku munsi w’ umukino hinjiraga ibitego 12.96 hanyuma kuri buri mukino hakinjira igitego 1.85.

1000: Abafana 1000 nibo barebye umuhango wo guha ikipe ya APR FC igikombe muri stade Amahoro yakira abantu hafi 30,000.

Tanga igitekerezo na Facebook

Tanga igitekerezo