Uko Miggy abona ubuzima mu minsi micye amaze muri Azam FC

Yanditswe na Admin ku wa 25.07.2015 saa 21:53 | Yasuwe : 999

Umukinnyi w’umunyarwanda uherutse kwerekeza mu ikipe ya Azam FC yo muri Tanzaniya avuye muri APR FC yo mu Rwanda, Mugiraneza Jean Baptiste `Migi’ aratangaza ko yemeye kujya muri Azam abizi neza ko agiye guhanganira umwanya n’abandi bakinnyi bakomeye bari muri iyo kipe.

Mugiraneza wasinye imyaka ibiri yatangaje kandi ko yahisemo kujya muri Azam kuko azi ko iyo kipe ifite gahunda nziza ndetse ikazanamufasha gutera imbere.

Mu kiganiro kirambuye yagiranye n’ikinyamakuru Mwanaspoti cyo muri Tanzaniya, MUGIRANEZA Jean Baptiste `Migi’ yavuze ko yahisemo gukinira ikipe ya Azam FC kuko yumvise ko iyo kipe ifite icyerekezo cyiza ndetse ko yita ku bakinnyi bayo neza.

Migi kandi yavuze ko yiyemeje kujya muri Tanzaniya kuko yashakaga gutera imbere mu mupira akurikije uburyo mugenzi we Haruna Niyonzima ,bakinanaga muri APR ndetse banakinana mu ikipe y’igihugu, yateye imbere nyuma yo guhindura shampiyona akajya mu ikipe ya Yanga avuye muri APR.

Ndizera ko ninkinana intego, nzazamura urwego rwanjye rw’imikinire kandi bishobora kumbera inzira yamfasha gusohoka nkajya gukina kure mu bihugu byateye imbere muri ruhago’’, Migi uherutse gusinya amasezerano y’imyaka mu ikipe ya Azam FC.

Migi yiteguye urugamba rukomeye

miggyazam

Nkuko ikinyamakuru Mwanaspoti kibivuga, umwanya wo hagati Mugiraneza akinaho ufite abandi bakinnyi basanzwe muri iyo kipe kandi bakomeye ku buryo bitazapfa korohera Migi kubona umwanya ubanza.

Muri aba bakinnyi harimo umunya Cote d’Ivoire Kipre Bolou ndetse n’undi witwa Himid Mao.

Icyakora ngo nubwo Migi azi ko bitazaba byoroshye, avuga ko yagiye muri Azam yiteguye nk’ingabo igiye ku rugamba kandi ko ingabo idatoranya ishyamba izarwaniramo.

Yabisobanuye agira ati`Ubwo nafataga icyemezo cyo kuza hano, nari niteguye, naje muri Azam nk’umusirikare, urabizi iyo umusirikari agiye ku rugamba, ntaba yitaye ku buryo ku buryo azarisohokamo, aba agiye abizi ko ari ugupfa cyangwa gukira

Yavuze ko kugira ngo atsinde icyo we abona nk’urugamba, ari ngo ngombwa ko habaho ubufatanye hagati ye n’abagenzi be, ubuyobozi bw’ikipe ndetse n’abafana.

Migi yagereranije ikipe ya Azam agiyemo nk’iya APR yo mu gihe cy’abakinnyi nka Mbuyu Twite, nyakwigendera Patrick Mafisango, Kabange Twite, Haruna Niyonzima na Leonel Saint Preux.

Migi yerekeje mu ikipe ya Azam FC nyuma yo gukinira ikipe ya APR FC imyaka umunani ndetse n’ikipe ya Kiyovu Sport yazamukiyemo. Migi w’imyaka 28 ni ise w’umwana umwe yabyaranye na Gisa Fausta umunyamakuru w’imikino kuri imwe muri televiziyo zo mu Rwanda.

Migi ni umwe mu bakinnyi bakomeye Ikipe y’Igihugu Amavubi igenderaho.

Tanga igitekerezo na Facebook

Tanga igitekerezo