Uko imikino y’umunsi wa gatandatu yagenze

Yanditswe na Admin ku wa 06.11.2014 saa 11:46 | Yasuwe : 1,073

Ku munsi wa gatandatu wa shampiyona kuri uyu wa gatatu taliki ya 05.11.2014, umukino ukomeye wari utegerejwe ni uwahujije Police Fc na APR FC ,warangiye amakipe anganya 0-0 i mugihe Rayon Sports yatsinze Espoir FC 1-0.

Umukino wa APR na Police wabereye kuri Sitade ya Kicukiro aho Police yakirira imikino yayo watangiye ikipe ya Police Fc isatira cyane ikipe ya APR FC ikaniharira umupira cyane cyane hagati muri mediyane  yabo ari nabyo byagoye cyane ikipe ya APR FC.

Rutahizamu Jacques Tuyisenge yabonye amahirwe atari macye yo gutsinda  ariko umunyezamu wa APR Fc Olivier Kwizera akamubera ibamba  akuramo amashoti menshi.

Ikipe ya APR Fc yagiye yiyubaka ari nako ikinira inyuma cyane. Iyi kipe ya gisirikare yaje kwigaragaza mu gice cya kabiri aho yaje isatira cyane, abasore nka Iranzi Jean Claude, Maxime Sekamana bateye amashoti akomeye izamu rya Police FC ariko umuzamu Marcel Nzarora ahaba ibamba kugeza umukino urangiye baguye miswi.

policeapr1415

Umutoza wa Police Fc, Andre Cassa Mbungo yavuze ko, ‘Twabuze amahirwe yo gutsinda, dutera imitambiko y’izamu inshuro nyishi. Tumaze kubura amanota 12 mu mukino tutashoboye gutsinda ariko ibi byose bifite impamvu,’

‘Ariko ndishimira uburyo twakinye, twashoboye kugaragaza ko ikipe ya Police ihari.vTurakomeza gutegure imikino iri imbere nubwo bitoroshye,’

Umutoza wa APR Dr. Ljubomir Petrovic yagize ati, ‘Ndishimye cyane uyu munsi, twakinye neza urebye imbaraga twatakashe ku mukino wa Rayon Sports. Twari dufite abakinnyi badahari kubera imvune ariko turashimira uburyo abakinnyi bitwaye kuko iyi mikino yose (Rayon na Police) yari ikomeye,’

Kuri Stade ya Kigali i Nyamirambo, Rayon Sports yari yahakiriye Espoir FC iva i Rusizi, aho yashoboye gutsinda igitego kimwe gitsinzwe na Fuadi Ndayisenga.

Umukino ugitangira Rayon Sports niyo yagaragazaga gusatira ubona Espoir idashaka kwinjira neza mu mukino ku buryo Rayon Sports yahushije ibitego cyane cyane Issac Muganza utarigaragaza nka rutahizamu ukomeye.

Ntibyatinze ariko kuko ku munota wa 28 ku mupira wazamukanwe neza na Makenzie ( uhagaze neza cyane muri ino minsi )  yawuhinduriye neza mugenzi we capitaine Fuadi Ndayisenga wahise atsinda ikigitego cya mbere ari nacyo cyonyine cyabonetse muri uno mukino.

Rayon Sports yahise imerera nabi cyane  Espoir FC, ariko ikibazo kikaba mu kurangiriza mu izamu nkuko bitaniye kumenyerwa n’abakunzi benshi ba Rayon Sports maze igice cya mbere kirangira ari igitego 1-0.

fuadindayi

Kapiteni wa Rayon Ndayisenga Fuadi wavunikiye muri uno mukino ntazagaragara mu mukino wa Gicumbi

Mu gice cya kabiri ikipe ya Espoir FC yaje yahinduye imikinire itangira gusatira cyane Rayon Sports ukabona ko ikinira hagati cyane ihererekanya neza. Abakinnyi bo hagati ba Espoir Mukunzi Clément na Ntaganda Elias bamereye nabi cyane abo hagati ba Rayon Sports.

Kapiteni Fuadi Ndayisenga yaje kuvamo kubera imvune, asimburwa na Uwizeye  Bernard.Uku kuvamo kwe byagabanyije umuvuduko wo ku mpande ku buryo bugaragara ariko Espoir ntiyashobora kubizamukiraho ngo ihindure ibintu.

Umutoza Sostène yashyizemo  Leo Uwambajimana mu mwanya wa Robert Ndatimana abigabanya igitutu cya Espoir  maze umukino urangira nta gihindutse

Nyuma y’umukino abatoza  bombi baganiriyye n’itangazamakuru.

Umutoza wa Rayon Sports Sosthene yagize ati, ” Byari byiza ko twongera kugaruka mu murongo wo gutsinda nyuma yo gutakaza ku cyumweru. Haracyari ikibazo mu busatirizi bw’ikipe, abayobozi barabizi, na buri umwe ureba ikipe ikina arabibona, ni hamwe muho tugomba kongeramo imbaraga.”

Umutoza Gatera Alphonse wa Espoir ati: ” Abakinnyi banjye benshi ntibarabona ibyangombwa, ubu bamwe mu bo ndi gukinisha baracyari bashya cyane, barumva izina nka Rayon Sports bakagira ikibazo. Twatangiye nabi, tuza kwisubiraho mu gice cya 2, ariko ikibazo cyabaga tugeze imbere y’izamu, aho usanga nta muntu uhari wo gushyira umupira mu rushundura.”

APR Fc ikomeje kuyobora urutonde rwa shampiyona n’amanota 14, aho irusha mukeba wayo Rayon Sports inota rimwe gusa.

Muri rusange, uko niko imikino y’umunsi wa gatandatu yagenze :

Kuwa Kabiri, 04.11.2014

Mukura 0-1 Marines (*Bienvenue Mugenzi)

Amagaju 0-0 AS Kigali

Isonga 0-3 Sunrise (*Jean d’Amour Bonane,*Patrick Munyankindi,*Vedaste Niyibizi)

Kuwa Gatatu, 05.11.2014

Police 0-0 APR

Musanze 0-1 SC Kiyovu (*Yussuf Habimana)

Etincelles 1-1 Gicumbi (*Hategikimana Bonaventure-Etincelles/ Djemba Banga-Gicumbi)

Rayon Sports 1-0 Espoir (*Fuadi Ndayisenga-Rayon)

Tanga igitekerezo na Facebook

Tanga igitekerezo