Uganda U17 yageze mu Rwanda

Ikipe y’igihugu y’umupira w’amaguru y’abakinnyi batarengeje imyaka 17 yageze mu Rwanda kuri uyu wa gatatu mbere y’umukino uzabahuza n’Urwanda kuwa gatanu I Rubavu.

U Rwanda ruzaba rusabwa gutsinda nibura ibitego 5 kugirango rwizere gukomeza mu kindi cyiciro cyo gushaka tike yo gukina imikino yanyuma y’igikombe cy’Afurika. Iyi kipe yageze i Kigali ivuye Kampala bakaba bacumbikiwe  kuri Hotel Impala nyuma yo gukora imyitozo yorohereje kuri Ferwafa kuwa gatatu nimugoroba.Kuri uyu wa kane, iyi kipe ya Uganda irerekeza i Rubavu aho uyu mukino uzabera bakazacumbikirwa kuri Hotel Peace land.

Rwandau17uganda

Photo Ferwafa

Umutoza wa Uganda Mathias Lule ntampinduka yigeze akora kuri ikipe yakinye n’Urwanda mu byumweru bibiri bishize. Mu mukino ubanza, Uganda yatsinze u Rwanda ibitego 4-0, bitsindwa na Shaban Mohammed, Pius Obuya, Julius Poloto hamwe na Musa Mukalazi.

Ikipe y’u Rwanda iyobowe n’umwongereza Lee Johnson yerekeje i Rubavu kuri uyu wa kane bakaba bacumbikiwe kuri Hotel Belvedere.

Ikipe izatsinda ku giteranyo cy’imikino yombi izahura ya Zambia mu kindi cyiciro cy’amajonjora.

Umukino wo kuwa gatanu uzaba saa 15h30 kandi uzasifurwa n’abasifuzi b’abarundi bagizwe na Pacifique Ndabihawenimana, Pascal Ndimunzigo, Shabani Niyungeko na Eric Gasinzigwa. Alfred Rwiza Kishongole kuva muri Tanzania niwe Komiseri w’uyu mukino.

Inkuru : Ferwafa

Tanga igitekerezo na Facebook

Tanga igitekerezo