UEFA Champions league: Ibyo wamenya ku makipe azahura muri 1/2

Yanditswe na Rwanda Football ku wa 14.04.2018 saa 00:01 |

Mu gihe UEFA Champions league y’uyu mwaka igenda igana ku musozo dore ko igeze muri 1/2 cy’irangiza, Teradignews.rw yaguteguriye byinshi bijyanye n’uko  amakipe yatomboranye kuzahura muri 1/2 yagiye ahura muri iri rushanwa riruta ayandi ku mugabane w’Uburayi utari uzi, cyane imikino aya makipe yagiye ahuriramo.

Imikino ya 1/2 iteganyijwe harimo igomba guhuza Bayern Munich na Real Madri, ndetse n’igomba guhuza Liverpool y’umutoza Jurgen Klopp na AS Roma.

Christiano Ronaldo na Robert Rewandowski ubu ni bo bahanzwe amaso.

 Bayern Munich v Real Madrid.

Uwavuga ko aya ari amwe mu makipe aziranye cyane mu marushanwa yo ku mugabane w’Uburayi ntiyaba yibeshye, ugendeye ku ncuro aya makipe amaze guhura.

Hasan Salihamidzic wa Bayern ahanganye na Sergio Ramos muri 2007.

Bayern Munich na Real Madrid zimaze guhura incuro 24 mu ma marushanwa yo ku mugabane w’Uburayi, aho Bayern yatsinzemo imikino 11, Real Madrid na yo itsindamo 11, mu gihe banganyije incuro 2 zonyine.

Bahura bwa mbere hari muri 1/2 mu gikombe cy’Uburayi cyo mu wa 1975/76. Umukino ubanza banganyije 1-1, uwo kwishyura Bayern iwutsinda ku bitego 2-0, Real Madrid isezererwa ku bitego 3-1.Aya makipe yaje kongera guhura mu 1986/87 muri 1/2 nanone cy’igikombe cya European Cup, cyangwa Champions league y’iki gihe.

Umukino ubanza wabereye mu Budage warangiye Bayern Munich inyagiye Real Madrid ibitego 4-1, mu gihe umukino wo kwishyura wabereye muri Espagne warangiye Real Madrid itsinze igitego 1-0, gusa ntabwo cyari gihagije kugira ngo igere ku mukino wa nyuma kuko Bayern yayisezereye ku bitego 4-1.

Abakinnyi ku mpande zombi bakunze gukanirana cyane.

Umwaka wakurikiyeho(1987/88) Bayern Munich na Real Madrid zongeye guhurira muri iri rushanwa, gusa ho zahuriye muri 1/4 cy’irangiza.

Umukino ubanza Bayern Munich yawutsinze ku bitego 3-2, uwo kwishyura Real Madrid iwutsinda ku bitego 2-0, inasezerera Bayern Munich ku giteranyo cy’ibitego 4-3 aho yahise ikatisha tike ya 1/2 cy’irangiza.

Mu wa 1999/2000 Bayern Munich na Real Madrid zahuye ku nshuro ya kane muri iri rushanwa ryari ryaramaze gufata izina rya EUFA Champions league. uyu mwaka bahuyemo incuro enye, harimo imikino ibiri yo mu itsinda dore ko bari bari kumwe, ndetse n’imikino ya 1/2cy’irangiza.

Christiano Ronaldo na Robert Rewandowski ubu ni bo bahanzwe amaso.

Umukino wa mbere ubanza wo mu itsinda Real Madrid yawutsindiwe muri Espagne ibitego 4-2, gusa uwo kwishyura wabereye mu Budage na yo iwutsinda ku bitego 4-1. Muri 1/2 Real Madrid yari iyobowe na Raul Gonzalez yatsinze umukino ubanza ku bitego 2-0, uwo kwishyura iwutakaza ku bitego 2-1, gusa ikomeza ku mukino wa nyuma ku bitego 3-2, iza no kwegukana iki gikombe itsinze Valencia ibitego 3-0 ku mukino wa nyuma

2000/01 aya makipe yongeye gucakiranira muri 1/2 nanone muri EUFA Champions league. Real Madrid yatsinzwe 1-0 mu mukino wabereye Santiago Bernabeu, uwo kwishyura wabereye mu Budage na wo iwutsindwa 2-1, Bayern Munich igera ku mukino wa nyuma ku bitego 3-1 ndetse inegukana n’igikombe itsinze  Valaencia kuri Penaliti, dore ko iminota isanzwe y’umukino yarangiye amakipe yombi anganya 1-1.

Nacho Ferbandes wa Real Madrid ahanganye na Arjen Roben wa Bayern Munich.

2002/02 Bayern Munich na Real Madrid zarongeye zirahura muri iri rushanwa. Kuri iyi ncuro, aya makipe yahuriye muri 1/4 cy’irangiza. Bayern Munich yatsinze umukino ubanza ku bitego 2-1, uwo kwishyura Real Madrid iwutsinda ku bitego 2-0, inakomeza muri 1/2 cy’irangiza ku bitego 3-2.

Mu mwaka wakurikiyeho(2003/04) aya makipe yahuriye muri Round ya 16. Umukino ubanza amakipe yombi yanganyije 1-1, uwo kwishyura Real Madrid itsinda 1-0 inasezerera Bayern ku bitego 2-1.

Aya makipe yongeye guhurira muri iki cyiciro muri 2006/07 aho umukino ubanza Real Madrid yawutsinze ku bitego 3-2, uwo kwishyura Bayern itsinda 2-1 inatambukira ku bitego byinshi yari yaratsindiye muri Espagne, gusa amakipe yombi yanganyaga ibitego 4-4.

Arjen Roben ahanganye na Marcelo wa Real Madrid.

2011/12 aya makipe na bwo yarahuye, ahurira muri 1/2 cya Champions league. Umukino ubanza Bayern yawutsinze ku bitego 2-1, uwo kwishyura Real Madrid iwutsinda kuri 2-1, Bayern ikomeza kuri penaliti 3-1 kuko bose banganyaga ibitego 3-3.

Muri 2013/14 Real Madrid na Bayern zahuriye muri 1/2 cya EUFA Champions league. Igitego cya Kharim Benzema ni cyo cyatandukanyije impande zombi mu mukino wabereye Santiago Bernabeu, mu gihe uwo kwishyura wabereye Allianz Arena Real Madrid yawunyagiyemo Bayern Munich ibitego 4-0, Real Madrid igera ku mukino wa nyuma ku bitego 5-0 aho yanegukanye igikombe itsinze Atletico Madrid ibitego 4-1.

Cristiano Ronaldo yitezweho byinshi

Bwa nyuma aya makipe aheruka guhura ni muri EUFA Champions league y’umwaka ushize(206/17) aho aya makipe yahuriye muri 1/4. Umukino ubanza wabereye Allianz Arena warangiye Real Madrid itsinze 2-1, uwo kwishyura iwutsinda 4-2 harimo ibitego 2 byinjiye mu minota 30 y’inyongera kuko iminota 90 yari yarangiye Bayern iri imbere n’ibitego 2-1, Real Madrid ikomeza muri 1/2 ku bitego 6-3 ndetse n’iki gikombe icyegukana itsinze Juventus ku mukino wa nyuama ibitego 4-1.

Artulo Vidal aracyafitiye Real Madrid umujinya nyuma y’ikarita itukura yaboneye mu mukino uheruka guhuza izi mpande zombi.

Liverpool v Roma

Liverpool na AS Roma bamaze guhura incuro 5 muri aya marushanwa yo ku mugabanwe w’uburayi. Liverpool ni yo yatsinzemo incuro nyinshi(2) Roma itsindamo incuro 1, mu gihe banganyije incuro 2.

Bahura bwa mbere hari ku mukino wa nyuma wa European Cup mu wa 1983/84. Uyu mukino warangiye amakipe yombi anganya igitego 1-1, gusa Liverpool itwara igikombe kuri penaliti 4-2.

Mohammed Salah na Raja Naingolan ni bamwe mu bahanzwe amaso mu mukino wa Liverpool na AS Roma.

Bongeye guhurira muri iri rushanwa muri round ya kane(1/8) muri 2000/02 aho umukino ubanza Roma yawutsinzwemo na Liverpool ibitego 2-0, uwo kwishyura AS Roma itsinda 1-0, gusa Liverpool ikomeza ku giteranyo cy’ibitego 2-1.

Bwa nyuma baheruka guhurira muri iri rushanwa ni muri 2001/02 aho umukino ubanza amakipe yombi yaguye miswi 0-0, uwo kwishyura Liverpool itsinda 2-0, aha bakaba bari bahuriye mu itsinda.

Tanga igitekerezo na Facebook

Tanga igitekerezo

Powered by Live Score & Live Score App