Ubukene muri shampiyona y’icyiciro cya kabiri

Yanditswe na Admin ku wa 08.05.2015 saa 17:49 | Yasuwe : 341

Amakipe yo mu cyiciro cya kabiri afite ubukene atewe n’uburangare bw’Ishyirahmwe ry’umupira w’amaguru mu Rwanda (FERWAFA) yatinze gutanga raporo muri Minispoc.

Mbere y’uko shampiyona y’icyiciro cya kabiri itangira, Minispoc yagiranye inama n’abayobozi b’amakipe, Minisiteri ya siporo n’umuco isaba ko shampiyona y’icyiciro cya kabiri yakinwamo n’abakinnyi batarengeje imyaka 20 ni nabwo yemeye ko izatera inkunga iri rushanwa.

Umuyobozi wa Siporo muri Minispoc, Bugingo Emmanuel yatangaje ko aya mafaranga koko bayemereye amakipe y’icyiciro cya kabiri, ariko basabye Ferwafa ko ibazanira imyirondoro y’abakinnyi yemeza ko ibyo basezeranye byakurikijwe, ariko ntibyubahirizwa.

Yagize ati “twasabye Ferwafa ko ituzanira imyirondoro y’abakinnyi, ariko batinze kubiduha ngira ngo kuwa gatatu nibwo twabonye ibaruwa, ariko nayo harimo ibibura ngira ngo hari umukozi wacu ubikurikirana kugira ngo turebe niba byuzuye cyangwa dusabe ko byuzuzwa kugira ngo dukore ibyo dusabwa”.

D2ubukene

Avuga ko raporo Ferwafa yatanze hari umuntu uri kuyisuzuma, ariko baje gusanga harimo ibitameze neza kuko ibyo basabye ataribyo batanze.Akomeza avuga ko atibuka neza umubare w’amafaranga bemereye buri kipe ariko icyo bazi neza ni uko bemeye inkunga izabafasha mu ngendo ndetse n’amafunguro.

Umuvugizi Ferwafa, Hakizimana Moussa yagize ati ” menya raporo barayitanze ubu hasigaye kuba hakwishyurwa ayo makipe ibintu bikava mu nzira”.Avuga ko niba raporo ituzuye bazabwira Ferwafa ibituzuye ariko bive mu nzira.Akomeza avuga ko ibyo Minispoc yasabye ari ukureba umubare w’amakipe,kureba abakinnyi imyaka bafite kuko hemejwe ko hagomba gukinamo abakinnyi bari munsi y’imyaka 20.

Umuyobozi w’ikipe ya Kirehe Ritimirwa Frederick atangaza ko inkunga bemerewe na Minispoc yatinze bityo batazi niba bazayibona kuko hashize igihe kinini ndetse bakaba batabwirwa impamvu itaboneka.Yagize ati “dufite ubukene bukabije cyane ndetse hari n’imyenda twagiye twiguriza kuko twari twizeye ubwo bufasha buzaboneka, ariko amaso yaheze mu kirere”.Avuga ko nk’abayobozi b’amakipe bafite igitekerezo cyo kwandikira Minispoc bagaragaza ubukene amakipe afite.

Umwe mu batoza utarashetse ko izina rye ritangazwa avuga ko mu nama bagiranye na Minispoc hari hemejwe ko buri kipe izahabwa miliyoni 4 n’ibihumbi 500 by’amafaranga y’u Rwanda.Shampiyona y’icyiciro cya kabiri yatangiye mu kwezi kwa Gashyantare uyu mwaka wa 2015 ikaba igizwe n’amakipe 25 mu matsinda abiri.

Tanga igitekerezo na Facebook

Tanga igitekerezo