U Rwanda ruzongera guhura na Uganda

Yanditswe na Admin ku wa 30.06.2014 saa 19:01 | Yasuwe : 742

Ikipe y’u Rwanda  Amavubi y’abatarengeje imyaka 17 izakina n’imisambi ya Uganda y’ ingimbi zitarengeje imyaka 17 muri uku kwezi tugiye gutangira kwa Nyakanga mu rwego rwo gushaka itike y’igikombe cy’Afurika kizabera muri Niger umwaka utaha .

Amavubi U17 ubu nta mutoza afite nyuma yuko uwari uyasinzwe umufaransa Richard Tardy  arangirije amasezerano ye kuri uyu wa Mbere tariki ya 30 Kamena 2014 ubu akaba yarisubiriye iwabo.

Aba bana kandi nta  umwanya uhagije wo kwitegura bigeze babona kuko n’umukino wa gicuti na Kenya yashatse utabonetse nkuko bitangazwa  na Kanamugire Aloys umutoza wungirije, yakinnye kuwa Gatatu umukino wa gicuti n’ingimbi za Kiyovu Sports nayo ibatsinda igitego 1-0.

u17_entr

Ikipe y’u Rwanda y’abatarengeje imyaka 17 mu myitozo. 

Kwitwara neza kw’ikipe y’igihugu y’abatarengeje imyaka 17 mu myaka ine ishize byatumye yo itazahera mu cyiciro cya mbere cy’amajonjora. Iyi kipe ahubwo ikazakina mu cyiciro cya kabiri cy’amajonjora.

Uganda yabonye itike nyuma yo gutsinda Seychelles ibitego 3-0 i Kampala mu mukino wo kwishyura aho umukino ubanza yari yayitsinze 2-1(byose hamwe 5-1).

Umukino ubanza n’u Rwanda uzabera i Kampala tariki ya 18 Nyakanga 2014 uwo kwishyura i Kigali ukazakinwa  tariki ya 2 Kanama 2014.

Mu mwaka 2011, u Rwanda rwatsindiwe ku mukino wa nyuma w’igikombe cy’Afurika cyabatarengeje imyaka 17 cyaberaga hano I Kigali na Burkina Faso ibitego 2-1 bitabira igikombe cy’Isi cyabereye muri Mexique aho banganyije umukino umwe wa Canada batsindwa na Uruguay n’u Bwongereza. Mu majonjora ya 2013, u Rwanda rwasezerewe na Botswana kuri penaliti 7-6.

Amakipe ane ya mbere muri iki gikombe azahagararira Afurika mu mu mikino y’ igikombe cy’ isi cyabatarengeje imyaka 17 izabera muri Chili kuva tariki ya 17 Ukwakira kugeza taliki 8 Ugushyingo 2015.

Tanga igitekerezo na Facebook

Tanga igitekerezo