Tchabalala yeretswe abafana ba Rayon baramwishimira

Yanditswe na Rwanda Football ku wa 12.01.2018 saa 07:01 |

Nyuma yo kugurwa na Rayon Sports, Shabban Hussein Tchabalala wakiniraga Amagaju yeretswe abafana, baramwimishira cyane ku buryo byageze aho bamuterura bamushyira mu kirere.

Ku kibuga cy’imyitozo cyo mu Nzove aho Rayon Sports ikorera imyitozo, kuri uyu wa kane abafana ba Rayon bakiriye rutahizamu mushya wakiniraga Amagaju, nyuma yo kugurwa n’iyi kipe kuri uyu wa kane.

Tchabalala yishimiwe bikomeye n’abafana ba Rayon Sports

Tchabalala wazanywe n’Umunyamabanga mukuru wa Rayon Sports Itangishaka Bernard, yaje guhita ajya ku kibuga aho ikipe yakoreraga imyitozo, abafana bamwakirana ibyishimo byinshi ndetse babanza no kumwikorera ku bitugu.

Tshabalala asanze muri Rayon Sports bagenzi be b’Abarundi barimo Kwizera Pierrot na Nahimana Shasir. Ahasanze kandi Bimenyimana Bon Fils Caleb wakinnye igihe kinini muri Shampiyona y’i Burundi.Abo bose nibo bamwakiriye bamuha ikaze ubona ko bamwishimiye. Byakunze kuvugwa ko Pierrot ari umwe mu bamukundishije ikipe ya Rayon Sports ndetse atuma ariyo ahitamo aho kujya muri Kiyovu Sports nayo byavuzwe ko yamushatse cyane.

Abarundi bagenzi be bakinana mu Ntmaba mu rugamba bamuhaye ikaze

Ikipe ya Rayon Sports imuzanye ngo afatanye na Diarra na we uzatangira gukinira Rayon Sports muri uku kwa mbere. Yasinyiye gukinira Rayon Sports mu mikino yo kwishyura ya Azam Rwanfa Premier League. Rayon Sports yahaye Amagaju miliyoni eshanu n’igice z’amanyarwanda (5.500.000 FRW).

Mu kiganiro yagiranye n’itangazamakuru, yatangaje ko yishimiye cyane kuba aje gukina mu ikipe ya Rayon Sports, kuko ayifata nk’ikipe ikomeye kandi ishobora kumuzamura.Ati “Birashimishije cyane kuba nabaye umukinnyi wa Rayon Sports, ni ikipe ikomeye kandi ifite abafana benshi, iyo uyikinamo bituma wanagaraga ukaba wakwigurisha, ndumva nizeye kuzayifasha kugera kuri byinshi.Kuri njyewe nzakora ibishoboka byose mfatanyije n’abandi bakinnyi kugira ngo tugeze ikipe (Rayon Sports) kure. Nta gitutu mfite kuko nzakora ibyo nshoboye ibindi nabyo nzabiharira Imana”.

Ahumuriza abafana b’i Nyamagabe, Shaban Hussein Tchabalala yagize ati“Icyo nshaka kubabwira, ni akazi k’umupira niko bigenda, na Neymar yavuye muri Barca kandi bari bamutegerejemo byinshi. Bihangane n’ubundi ni mu rugo tuzasubira. Nahisemo Rayon Sports kuko ibamo uguhatana kandi ni ikipe nziza ku bakinnyi kuko baba bagiye ku isoko”. 

Mugume Yassin waturutse Uganda muri Police FC nawe yishimwe cyane n’abafana

Iyi kipe ya Rayon Sports kandi yanagaragayemo abandi bakinnyi babiri baturutse Uganda, harimo uwitwa Mugume Yassin washimwe cyane n’abafana ndetse n’abatoza bavuga ko bategereje kongera kumwitegereza, hakaza ndetse n’undi witwa Yafe Yaffesi utigaragaje cyane.

Tanga igitekerezo na Facebook

Tanga igitekerezo

Powered by Live Score & Live Score App