Sugira Ernest ku rutonde rw’ abakinnyi bifuzwa n’ ikipe ya Everton yo mu Bwongereza

Yanditswe na Rwanda Football ku wa 23.03.2017 saa 14:26 | Yasuwe : 817

Umukinnyi w’ umunyarwanda ukinira ikipe ya As Vita Club yo mu gihugu cya Congo Kinshasa Sugira Ernest arifuzwa n’ ikipe ya Everton ibarizwa mu cyiciro cya mbere mu Bwongereza itozwa na Ronald Koeman.

Sugira Ernest w’ imyaka 25 yifujwe n’iyi kipe nyuma yaho aherutse kwigaragaza atsindira ikipe ye ya AS Vita Club mu mikino ya CAF Champion’s League ubwo basezereraga ikipe ya Gambia side Ports Authority bayitsinze ibitego bibiri ku busa harimo kimwe cya Sugira.

Muri iki cyumweru nibwo ubuyobozi bw’ ikipe ya AS Vita Club bwakiriye ubusabe buvuye mu ikipe ya Everton babamenyesha ko bifuza uyu rutahizamu w’ Umunyarwanda Sugira Ernest.

Ikipe ya Vita club niramuka ibyemeye biteganyijwe ko Sugira  azahita ajya mu gihugu cy’ Ubwongereza akahamara ibyumweru bibiri ari mu  igeragezwa.

Sugira Ernest

Nkuko ikinyamakuru Eyefootball dukesha iyi nkuru cyabyanditse kiravuga ko umutoza wa Everton Ronald Koeman yizeye kubona uyu rutahizamu dore ko afatwa nk’ intwari mu gihugu cye cy’ u Rwanda bitewe nuko yigaragaje mu mikino ya CHAN iheruka kuhabera.

Umutoza wa Everton yiteguye gutanga akayabo k’ amafaranga angana n’ ibihumbi Magana abiri na mirongo itanu y’ amadorali $250,000 ngo amubone. Si ikipe ya Everton ishaka Sugira gusa kuko hari n’ amakipe abiri yo mu Bufaransa yifuza uyu musore harimo Rennes na Nice.

Ernest Sugira naramuka aguzwe n’ ikipe ya Everton azaba abaye umunyarwanda wa mbere uguzwe n’ ikipe yo mu cyiciro cya mbere muri shampiyona y’Abongereza izwi nka Premier League.

Sugira Ernest yanyuze mu makipe atandukanye hano mu Rwanda. Yahereye mu cyiciro cya kabiri akinira ikipe ya AS Muhanga ayivamo yerekeza muri APR FC , yaje kwirukanwa muri APR FC ahita ajya muri AS Kigali ari nayo yavuyemo ajya muri AS Vita Club. 

Tanga igitekerezo na Facebook

Tanga igitekerezo