Sitade za CHAN zizaboneka muri Kanama : Visi Perezida wa CAF

Yanditswe na Admin ku wa 10.06.2015 saa 01:00 | Yasuwe : 731

Nyuma yo gusura ama sitade n’ibibuga by’imyitozo bizifashishwa mu gikombe cy’Afurika cy’abakina imbere mu gihugu “CHAN” kizabera mu Rwanda muri Mutarama 2016, Visi Perezida wa CAF yasezeranyijwe ko imirimo yo kubaka izaba isojwe muri Kanama 2015.

CHAN izakinirwa ku bibuga bine aribyo  stade Amahoro na stade y’i Nyamirambo i Kigali, stade Huye mu Majyepfo na stade Umuganda mu ntara y’Iburengerazuba.

Ku Cyumweru, Almamy Kabele Camara yasuye stade ya Kigali maze kuwa Mbere ajya gusura stade Huye n’Umuganda. Kabele avuga ko imirimo yo kubaka stade zizakinirwaho CHAN iri kugenda neza ariko asaba ko stade Umuganda yashyirwamo intebe kuko muri aya marushanwa nyafurika batareba imikino bahagaze.

kabele

 Yagize ati “Imirimo yo kubaka iri kwihuta haba ku bibuga by’imyitozo na stade, abayobozi n’abari kubaka batwijeje ko muri Kanama iyi mirimo izaba yarangiye.”Visi Perezida wa CAF avuga ko kuba iyi mirimo iri kwihuta biri guterwa n’ubushake bw’ubuyobozi bw’u Rwanda aho bari guharanira gukora ibyo CAF isaba cyane mu bikorwa remezo.

Kabele ufite imikino ya CHAN mu nshingano ze yavuze ko i Kigali hazakinira amatsinda abiri, itsinda A rizaba ririmo u Rwanda rizakinira kuri stade Amahoro.

Uretse stade n’ibibuga by’imyitozo, Kabele avuga ko kuba u Rwanda rusanzwe rufite ibikorwa remezo byinshi bitabagoye kuko nk’aho bageze hose basura amastade basanze hari ibikorwa by’itumanaho, internet yihuta n’imihanda. Kabele ati “ Nk’i Kigali hamaze gutoranywa amahoteli umunani azabamo amakipe azahakinira n’abayobozi ba CAF bazaba baje muri iyi mikino.”

Amajonjora yo gushaka itike yo kuza mu Rwanda azatangira muri Kanama asozwe muri Nzeli aho amakipe 42 ari guhatanira imyanya 15 yiyongera k’u Rwanda ruzakira.

Ni ku nshuro ya kane hagiye gukinwa iyi mikino nyafurika, iheruka yabereye muri Afurika y’Epfo yegukanwa na Libya ihabwa igikombe n’ibihumbi 750 $ mu gihe miliyoni 3.2$ yagabanyijwe amakipe 16 yitabiriye.

 

Tanga igitekerezo na Facebook

Tanga igitekerezo