Sitade y’i Gahanga na nubu ntiratangira kubakwa

Yanditswe na Admin ku wa 01.07.2014 saa 20:12 | Yasuwe : 959

Ikompanyi yo mu gihugu cya Turikiya yasinyanye na Leta y’u Rwanda amasezerano yo kubaka umushinga w’ama miliyoni y’amadolari ikomeje kwitakana Leta y’u Rwanda muri gahunda yo kubaka sitade y’imikino ya Gahanga.

Iyi sitade ya Gahanga ikaba yarasezeranijwe kuzubakwa n’ikompanyi y’Ubwubatsi ya Babilax yo mu gihugu cya Turikiya gusa kugeza ubu imirimo yo kubaka iyi sitade ntiratangira ndetse n’ikibanza kizubakwamo iki kibuga ntikiraboneka dore ko ndetse kigifite ibibazo bitandukanye harimo nko kuba abantu bose bagomba kwimurwa batarishyurwa amafaranga yabo y’ingurane.

Mu kiganiro n’tangazamakuru , Osman Özdemir, umuyobozi muri Babilax ushinzwe ibikorwa byo gushyira mu bikorwa uyu mushinga yihakanye Leta y’u Rwanda avuga ko ariyo ikomeje gutuma imirimo y’iyi sitade idindira.

gahanga

Uyu mugabo yagize ati:”Ntidutekereza ko ikibazo kinini kiri kuri twe kuko n’ikibanza batwemereye kigifite ibibazo.”

“Haracyari abantu batuye muri buriya butaka. Imiryango myinshi ivuga ko itigeze yishyurwa amafaranga yabo y’ingurane, haracyari amazu muri buriya bukaka, ikibanza ntikiraboneka.”

Osman yongeyeho ko ikibazo kitari ku gishushanyo mbonera cy’uyu mushinga.Yakomeje avuga ko hariho gahunda y’uko uyu mushinga wahagaragara.

Yagize ati:”Mu byumweru 2 bishize, twabonye ibaruwa iturutse muri Minisiteri ivuga ko bashaka kuba basubitse uyu mushinga, bitari ukuwuhagarika, ibyo turabyumva. Mu mezi abiri ashize, abayobozi bo mu ishyirahamwe ry’umupira w’amaguru muri Afurika (CAF) baje hano bizeza Guverinoma ko mu gihe baba bashoboye gusana no kwagura amasitade ahari byaba bihagije.”

Iyi sitade biteganijwe ko izaba ifite imyanya igera ku bihumbi 40 ndetse ikazarangira itwaye akayabo ka Miliyoni 150 y’amadolari y’Amerika. Ni ukuvuga agera kuri Miliyari 97.

Babilax iyi kompanyi itegerejwe mu kubaka iyi sitade ivuga ko imirimo yagombaga gutangira mu kwezi kwa Mata uyu mwaka ariko bikaza gukererezwa n’uko ku ruhande rwa Leta y’u Rwanda habuze amafaranga.

Iyi kompanyi yaje mu Rwanda mu mwaka wa 2012 nyuma yo kugira igitekerezo cyo kubaka iyi sitade y’imikino. Ni bwo iyi kompanyi yahise itangira ibiganiro binyuze mu kigo cy’igihugu gishinzwe iterambere RDB.

Tanga igitekerezo na Facebook

Tanga igitekerezo