Sibomana Patrick ari gushakwa na SV Zulte Waregem yo mu Bubiligi

Yanditswe na Admin ku wa 11.05.2017 saa 19:47 | Yasuwe : 32

Rutahizamu wa APR FC n’ikipe y’igihugu Amavubi, Sibomana Patrick bita Papy ari gukina umwaka wa nyuma muri shampiyona y’u Rwanda mbere yo kujya mu Bubiligi. Arifuzwa n’amakipe atandukanye yoyongereyeho SV Zulte Waregem.

Imyaka yari ibaye irindwi (7) nta kipe yo mu Bubiligi yifuza umukinnyi wo mu Rwanda, kuko uheruka kujya gukina muri shampiyona yaho ni Salomon Nirisarike wagiye mu igeragezwa muri Royal Antwerp Football Club nyuma iza no kumusinyisha.

Uyu mwaka wa shampiyona ushobora gusiga abandi bakinnyi batatu bavuye muri shampiyona y’u Rwanda basinye mu makipe yo mu Bubiligi, barimo Pierrot Kwizera na Nshuti Dominique Savio ba Rayon sports na Sibomana Patrick Pappy wa APR FC.

Sibomana Ptrick Pappy ushakwa n’amakipe menshi

Amahirwe kuri Sibomana akomeje kwiyongera kuko yifuzwa n’amakipe menshi yiyongereyeho SV Zulte Waregem nkuko yabitangarije Ikinyamakuru Umuseke.

“Amakipe menshi arashaka. SV Zulte Waregem yamaze kuvugana n’ubuyobozi bw’ikipe yanjye kandi batangiye kunshakira ibyangombwa by’inzira. Nta gihindutse nzajya mu igeragezwa muri Kamena. Nta byinshi nshaka kubitangazaho kuko ntaho biragera. Nibirangira nzabitangaza birambuye.”

Iyi kipe yiyongereye kuri AFC Tubize bivugwa ko yohereje intumwa mu Rwanda ngo ziganire n’uyu musore w’imyaka 22.

Sibomana wageze muri APR FC muri 2013 akayihesha ibikombe bitatu bya shampiyona, bishobotse ko ajya gukina nk’uwabigize umwuga mu Bubiligi yagenda ari umugabo kuko azarushinga tariki 20 Gicurasi 2017.

Tanga igitekerezo na Facebook

Tanga igitekerezo