Sibomana Abuba yageze mu Mavubi : batandatu basezerewe

Myugariro Sibomana Abubaukinira ikipe ya Gor Mahia yo muri Kenya yageze mu mwiherero w’ikipe y’igihugu irimo kwitegura umukino na Mozambique mu rwego rw’amajonjora y’igikombe cy’afurika cya 2017 kizabera muri Gabon.

U Rwanda ruri mw’itsinda H ruzakina na Mozambique kuri iki cyumweru tariki ya 14/06/2015 I Maputo.Sibomana Abuba aje asanga kapiteni Haruna Niyonzima nka bamwe mu bakinyi bakina hanze y’u Rwanda bashoboye kuboneka mu gihe ikipe y’igihugu irimo kwitegura urugamba rwo kureba niba bakwerekeza mu mikino yanyuma y’igikombe cy’afurika.

Abandi bakinnyi bagomba kuza barimo Salomon Nirisarike na Elias Uzamukunda ntibakije kubera impamvu zitandukanye. Ikipe ya Nirisarike, Saint Trond yifuje ko yamurekura akaza hagati muri iki cyumweru hanyuma Uzamukunda we arimo gushakisha indi kipe ku buryo kuza kw’aba bakinnyi byabonekaga ko bitinda kandi bishobora kuvangira gahunda z’umutoza Jonathan McKinstry ahitamo gufata icyemezo cyo kubihorera ahubwo akibanda mu gutegura cyane abakinnyi yahamagaye bari mu Rwanda.

Nyuma y’irushanwa ryo kwibuka ryabaye kuwa gatandatu no ku cyumweru, umutoza McKinstry yahise asezerera abakinnyi batandatu  mu rwego rwo gukomeza kurebera hamwe abakinnyi bashobora kuguma muri 18 bazakina umukino wa Mozambique.

abuba

Abakinnyi batandatu basezerewe barimo ; Bertrand Iradukunda (APR), Robert Ndatimana (Rayon Sport), Jean Marie Safari (Gicumbi), Antoine NDayishimiye (Gicumbi), Marcel Nzarora (Police) na Kevin Muhire (Isonga).

Aganira n’urubuga rwa Ferwafa, McKinstry yagize ati: “Nyuma y’imikino twakinye na Tanzania na Kenya, nahise mbona ishusho nyayo y’abakinnyi bose. Nahisemo gusezerera batandatu kugirango nkomeze kwitegereza neza abakinnyi 23 basigaye mu mwiherero”.“Aba batandatu si babi kandi bitwaye neza pe muri iyi mikino twakinnye ariko ntibari ku rwego rwaba 23 basigaye. Ibi biramfasha kurebera hamwe neza abakinnyi 18 nzitwaza mu mukino wa Mozambique.”“Muri 23 basigaye, nzatoranyamo 18 kuwa kane mbere yuko twerekeza muri Mozambique kuri uwo munsi nyinjoro,”

Ikipe y’igihugu irakomeza imyitozo kuri uyu wa kabiri, aho iri bukore kabiri ku munsi kuri Sitade Amahoro.U Rwanda ruzakina na Mozambique i Maputo mu mukino wa mbere w’itsinda H mu Cyumweru gitaha naho umukino wa kabiri ku Rwanda ruzakina n’igihangange Ghana i Kigali mu kwezi kwa Nzeli.

Tanga igitekerezo na Facebook

Tanga igitekerezo