Sheikh Hamdan Habimana yatorewe kuyobora ihuriro ry’ibigo byigisha umupira

Yanditswe na Admin ku wa 31.03.2017 saa 19:03 | Yasuwe : 36

Kuri uyu wa gatanu taliki ya 31.03.2017 nibwo  Sheikh Hamdan Habimana yatorewe kuyobora ihuriro ry’ama centres agera kuri 223 hirya no hino mu gihugu yigisha abana bakiri bato umupira w’amaguru.

Iri huriro ryakoze amatora y’abayobozi bashya kuri uyu wa Gatanu ku cyicaro cya Ferwafa,  aho bahisemo Sheikh Hamdan Habimana wahoze ari Umunyamabanga wa Mukura VS kugira ngo ababere umuyobozi mu myaka itatu iri imbere.

Amaze gutorwa, Hamdan yatangaje ko ashaka kuzana impinduka muri ruhago y’abakiri bato ku buryo bitarenze Mata 2017 hagomba gutangira amarushanwa y’abari munsi y’imyaka 13 bazajya bakina mu Ntara iwabo (League). Akaba ateganya ko amakipe abiri azaba aya mbere muri buri Ntara n’Umujyi wa Kigali azahura, abana bagaragaje impano bakazashakirwa n’imikino mu mahanga.

Abayobozi batowe na bamwe mu banyamuryango ba Ijabo Ryawe

Yagize ati “Intego ya mbere ni uko abana bakina, bakitabwaho hakaboneka abazamuka no mu bindi byiciro. Mu kwezi gutaha tuzatangirana n’abatarengeje imyaka 13 aho bazahura mu duce (league) uko ari tune n’Umujyi wa Kigali. Hazazamuka amakipe abiri muri buri gace noneho ahurire i Kigali ubwo azaba ari 10, akine. Abana bazigaragaza cyane dushobora no kubashakira imikino ya gicuti hanze, bakagenda bagakina.”

Iri rushanwa ry’abari munsi y’imyaka 13 nirimara gushinga imizi, hazakurikiraho ibindi byiciro birimo ab’imyaka 15 na 17, byose bizajya bikinira mu ma centres n’ama academy ku bufatanya n’ibigo by’amashuri, bakazamuka baramenyereye amarushanwa.

Uyu muyobozi abajijwe aho ingengo y’imari yo gukora imishinga itandukanye izava, yavuze ko agiye gukoresha imbaraga zose afatanyije na komite bakegera inzego zirimo minisiteri ifite siporo mu nshingano zayo, Ferwafa ndetse n’ababyeyi b’abana bagakorana, buri wese akazana inkunga ye ku buryo mu myaka itatu u Rwanda ruzaba rushobora kubona amakipe y’abari munsi y’imyaka 15 na 17 akomeye kandi y’abana batojwe.

Habimana yanavuze ko azashaka abafatanyabikorwa mu gufasha abatoza b’abana basanzwe babikora gusa kuko babikunda, nta hantu babyize nta n’amahugurwa bahawe. Bazahugurwa, banahabwe ibyangombwa by’ibanze hashingiwe ku byiciro by’abana.

Ijabo Ryawe ryayoborwaga na Elvis Mironko kuva mu 2015, yeguye mu kwezi gushize, inshingano ze zisigarana Capt. Gatibito Byabuze wanagizwe Perezida wungirije mu matora yo kuri uyu wa Gatanu.

Capt. Gatibito Byabuze (ufite micro )na Sheikh Hamdan Habimana

Sheikh Hamdan Habimana yanganye mu matora na Nkotanyi Ildephonse, Aloys Ntahobitagwa na Philemon Rukema, ariko baje kwikuramo bituma atsinda ku majwi 159 ku banyamuryango 167 batoye.

Yungirijwe na Capt. Gatibito Byabuze nka Visi Perezida wa mbere, Antoine Dukuzimana Visi Perezida wa kabiri, Muteteri Jeanne nk’Umunyamabanga na Jean Pierre Nkurikiyinka watowe nk’umubitsi. Batoye kandi abajyanama barimo Badiri Turabanye, Eng. Alexis Redamptus Nshimiyimana na Suzuki Mpanzi.

Tanga igitekerezo na Facebook

One thought on “Sheikh Hamdan Habimana yatorewe kuyobora ihuriro ry’ibigo byigisha umupira

  • 03/07/2017 at 17:49
    Permalink

    ariko mka buriya baba babanje kureba uwo bahaye ubuyobozi…yewe yewe nta shuri buretse ubwiyemezi ubwambuzi… umntu udafite casier judiciaire itari vide sinumva ngo na dubai bamuzanye ku mapimgu…reka yikuriremo aye abumutse nkibyo yakoze gahutu…

    Reply

Tanga igitekerezo