Shampiyona yatangiriye ku ntsinzi ya Rayon na Espoir

Yanditswe na Admin ku wa 19.10.2014 saa 16:56 | Yasuwe : 825

Shampiyona y’icyiciro cya mbere hano mu Rwanda yatangiye  ku mugaragaro kuri  uyu wa gatandatu  aho Rayon Sports yatsinze  Amagaju 1-0 mu mukino wabereye i Nyamirambo.

Ni nyuma yo kwimurwa inshuro nyinshi bitewe n’ikibazo cy’abanyamahanga bakina mu Rwanda barabatijwe amazina cyangwa barashakiwe ibyangombwa.

Muri uyu mukino Rayon Sports niyo yagaragaje umupira mwiza biza no kuhira ibona igitego ku munota wa 22 w’umukino,gitsinzwe na Peter Otema wavuye muri  Police FC, ku mupira wari uhinduwe neza na  Makenzie.

Amagaju nayo yabonye uburyo bwinshi bwo kuba yakwishyura igitego  ariko ba rutahizamu bayo gutaha izamu bikabagora cyane .

rayonamagaju14153

 Peter Otema niwe watsindiye Rayon Sports igitego rukumbi

Mbere yuko igice cya mbere cy’umukino kirangira, myugariro Faustin Usengimana yaje kugongana n’umukinnyi w’Amagaju agira  ikibazo mu mpyikobaita bamusimbuza.Uyu Faustin kandi nibwo yari agisubira mu kibuga nyuma y’igihe kirekire ( umwaka ) yari amaze yaravunitse bikomeye.

Mu gice cya kabiri amakipe yombi yaje yiyemeje gusatirana ariko ntihagira ibasha kuba yareba mu izamu ry’iyindi , maze umukino urangira ari icyo gitego 1-0.

Nyuma y’umukino, mutoza Sostene wa Rayon Sports yatangaje ko yishimiye uko bitwaye, avuga ko hari icyizere ko n’imikino iri mbere bazabyitwaramo neza.

Yagize ati: ” Umukino iyo urangiye hari icyo ukwigisha, ahabaye ibibazo ukabikosora, ahari ibyiza ukagerageza kongeramo imbaraga, biragaragara ko mu busatirizi Tudahagaze neza cyane, ariko tugomba kubikosora ni ubwo nta mwanya uhagije dufite.”

Ku ruhande rw’umutoza Bekeni w’ikipe y’Amagaju, we akaba yatangaje ko ikipe ye yagerageje kwitwara neza, ageraranyije nuko bari bitwaye mu mukino wa gicuti bahuyemo na Kiyovu Sports, atangaza ko bazakora ibishoboka byose, mu mikino izajya ibera iwabo ntibahatsindirwe.

Bekeni ati: ” Gutsindwa wahuye na Rayon Sports, ntabwo ari bibi cyane, tugiye kwitegura neza kurushaho, Tugakora ibishoboka byose, ntituzigere dutsindirwa iwacu. Uzaza akadutsindira mu rugo, nzemera ko ari umugabo.”

Mu yindi mikino yabaye kuri uyu wa Gatandatu, ikipe ya Etincelles yanganyirije mu rugo n’Isonga ibitego 2-2, ikipe ya Espoir itsinda Mukura i Rusizi igitego 1-0.

Imikino iteganyijwe kuri iki cyumweru:

  • Kiyovu Sports vs Marines (Mumena)
  • APR FC vs Musanze FC (Stade de Kigali)
  • Gicumbi FC vs Police FC (Gicumbi)
  • Sunrise vs AS Kigali (Rwamagana)
Tanga igitekerezo na Facebook

Tanga igitekerezo