Sebanani Crespo agiye kugaruka mu Rwanda

Umukinnyi Sebanani Emmanuel bita Crespo  wa Police F C umaze ukwezi muri Rumaniya  agiye kugaruka mu Rwanda kuko ikipe ya Polisi yanze kumurekura ngo akinire ikipe yitwa Fc  Otelul Galati.

Uyu mukinnyi Crespo yatangaje ko  nta gihindutse azaza mu Rwanda mu cyumweru gitaha kugira ngo akomeze gukinira ikipe ya Polisi. Uyu musore yagize ati “nari maze igihe nkorera imyitozo muri Fc  Otelul Galati ndetse nitwaye neza kuko ikipe yari yashimye, ariko kubera ko igihe cyo kugura abakinnyi cyari cyarangiye bansabye ko naba ngumye hano ngategereza mu kwezi kwa mbere ngo nsinye, ndetse ibyo nari nabyemeye ariko Polisi yanze kundekura niyo mpamvu ngiye kwigarukira mu Rwanda.”
Uyu musore avuga ko mu mwaka we wa mbere muri iyi kipe nta mafaranga yari guhabwa aguzwe (frais de recrutement) ariko yari kujya ahembwa n’iyi kipe.Crespo avuga ko yababajwe n’icyemezo cya Polisi cyo kutamurekura ngo akine i Burayi ariko ntacyo yagikoraho, gusa akemeza ko azakinira Polisi atameze neza kubera kutamuha ayo mahirwe.

Emmanuel-Sebanani

Mayira Jean de Dieu, Umunyamabanga Mukuru wa Polisi akaba n’umuvugizi wayo, avuga ko Crespo batari kumurekura ngo akine i Burayi kandi nta mafaranga bahawe n’ikipe yagombaga kwerekezamo. Yagize ati “ntabwo twari kwemerera Crespo ko yerekeza muri Fc  Otelul Galati kandi nta mafaranga duhawe mu gihe akidufitiye amasezerano y’umwaka, niyo mpamvu twamwimye impapuro zimurekura.”

Fc  Otelul Galati ni ikipe isanzwe mu cyiciro cya mbere muri Rumaniya ndetse ifite n’ibigwi  kuko isanzwe initabira imikino ya Champions’ league ku mugabane w’i Burayi.Iyi kipe yatwaye igikombe cya mbere cya shampiyona muri 2011/2012 ihita initabira  imikino ihuza amakipe yitwaye neza iwayo “Champions’ league” ku nshuro yayo ya mbere.Iyi kipe yashinzwe mu wa 1964, imaze gutwara igikombe kimwe cya shampiyona mu cyiciro cya mbere, ndetse yanatwaye ibikombe bibiri muri shampiyona y’icyiciro cya kabiri.
Iyi kipe kandi imaze gutwara igikombe cy’igihugu rimwe ndetse n’igikombe kiruta ibindi muri Rumaniya (Romania super cup) inshuro imwe.

Inkuru : Izuba Rirashe

Tanga igitekerezo na Facebook

Tanga igitekerezo