Rurangirwa Louis natorerwa kuyobora FERWAFA azongera amafaranga y’abasifuzi

Yanditswe na Rwanda Football ku wa 27.03.2018 saa 15:19 |

Umukandida ku mwanya wa Perezida w’ishyirahamwe ry’umupira w’amaguru “FERWAFA”, Rurangirwa Louis aravuga ko naramuka atowe azazamura imibereho y’abasifuzi.

Mu myaka ishize umusifuzi mpuzamahanga wo mu Rwanda yahabwaga ibihumbi 15 ku mukino wa shampiyona mu gihe utari mpuzamahanga abona agahimbazamusyi  k’ibihumbi 10.

Usibye kuba agahimbazamusyi ari gacye, ntikanabonekera igihe aho mu myaka ishize bashoboraga kumara amezi atanu batarabona amafaranga yabo, ibi bikaba byanaviramo bamwe kwakira ruswa y’amakipe.

Rurangirwa Louis wahoze ari umusifuzi mpuzamahanga asanga umupira utatera imbere mu gihe abasifuzi bagihabwa aya mafaranga. Ati “Nzashyira imbere cyane kuvugurura imibereho y’abasifuzi. Nzongera amafaranga bagenerwa. Bazabona amahugurwa n’imirongo myiza. Abasifuzi bazajya bamenyeshwa kare ingengabihe yabo y’imikino banatunganyirizwe ibishoboka mbere yo kujya ku murimo’’.

Imigabo n’imigambi ya Rurangirwa

Amatora ya FERWAFA azaba tariki 31 Werurwe 2018, Rurangirwa avuga ko natorwa  azakorana na Minisiteri y’Uburezi mu gutoza abana bakiri bato umupira w’amaguru bihereye mu mashuri ahazitabwa cyane ku myitozo ngororamubiri. Akomeza avuga ko azakorana na Minisiteri y’Ubutegetsi bw’Igihugu binyuze mu nzego z’ibanze bakangurire abaturage gukina umupira w’amaguru ku buryo buri mudugudu, umurenge n’akarere bigira amakipe. Hazanashyirwaho ibigo by’imyitozo muri buri ntara.

Rurangirwa Louis

Rurangirwa azanafatanya na Minisiteri y’Umuco na Siporo mu kuvugurura imikorere y’ishuri ry’umupira w’amaguru ry’abana b’intyoza “Isonga”  ku buryo rizahinduka Rwanda National Football Academy. Azanaharanira ko hajyaho umutoza w’ikipe y’igihugu ushoboye. Ku buyobozi bwe buri kipe yose yo mu Rwanda izagira ikipe nto (Cadets) n’iy’ingimbi (Juniors). Azashishikariza abashoramari bo mu Rwanda n’abo hanze gushora imari mu mupira w’amaguru

Rurangirwa azanavugurura amategeko atakijyanye n’igihe anashishikarize amakipe yose kugira umuganga w’inzobere.Azanita ku bakinnyi abashakira amahugurwa ku mirire, ubuzima n’uburere mboneragihugu no gutegura ubuzima bwabo bw’ejo hazaza.

Azanaharanira kuzamura umupira w’abagore awuvane ku rwego uriho ubu awushyire ku rwego rushimishije. Azanashyiraho irushanwa ry’abari n’abategarugori rizajya risozwa ku ya 08 Werurwe ku munsi wabo.

Mu tundi dushya, Rurangirwa yemeza ko buri muyobozi w’ikipe azajya ahabwa inkunga ya buri mwaka yo kumufasha kuzuza inshingano ze. Bazanabona ingendoshuri n’amahugurwa hagamijwe kuzamura ubushobozi bwabo. Buri gihembwe ku bwe, hazajya habaho ikiganiro n’itangazamakuru, ndetse abanyamakuru bahabwe amahugurwa abafasha kuzamura imikorere.

Abakinnyi bakanyujijeho bazahabwa agaciro batari bakibona, bazanagire uruhare mu gukundisha Abanyarwanda umupira w’amaguru.

Abayoboraga basize umwiryane mu banyamuryango ba FERWAFA

Uyu mugabo ashima ibyakozwe na Nzamwita wayoboraga FERWAFA akazanabyubakiraho mu buyobozi bwe. Kimwe mu byo asanga agiye kwitaho bitagenze neza ni amategeko. Ati “Muri manda ishize habonetse ikibazo cy’urujijo ku buryo utamenya ngo kuva iki kibaye biragenda gutya. Hari nkaho imvura yagwaga buri  wese akibaza ngo hagiye gukurikiraho iki? Hagashira iminsi ibiri abantu bakibaza ngo umukino wose uzasubirwamo cyangwa bazakina iminota yari isigaye’’.

Anagaruka kandi ku kibazo cy’ubushobozi aho amwe mu makipe yagiye aterwa mpaga. Rurangirwa asanga Nzamwita asize amacakubiri mu banyamuryango ba FERWAFA. Ati “Iyi manda irangiye mu banyamuryango hari amacakubiri. Hajemo ibice, abandi bari ku ruhande, ibyo biri mu bintu byambabaje. Naricaye ndareba nti uyu ni umupira turimo? ‘’

Ibyo wamenya kuri Rurangirwa Louis mu mupira

Rurangirwa yinjiye mu mupira w’amaguru mu 1998 nk’umutoza w’ishuri rya EAV Kabutare azamura abakinnyi batandukanye barimo Ntare Freddy n’abandi.

Mu 2000  yakoze amahugurwa y’ubusifuzi atangira gusifura mu kiciro cya kabiri azamurwa mu cya mbere mu 2006 ahita aba n’umusifuzi mpuzamahanga wa FIFA. Yasezeye iby’ubusifuzi mu 2011 kubera ikibazo cy’imvune yo mu ivi. Ubu  ni Perezida w’ikipe ya Rugende FC.

Tanga igitekerezo na Facebook

Tanga igitekerezo

Powered by Live Score & Live Score App