Rtd) Brig. Gen. Sekamana ushaka kuyobora FERWAFA ngo amaze imyaka 18 atareba umupira

Yanditswe na Rwanda Football ku wa 16.03.2018 saa 21:28 |

Brig. Gen. Sekamana Jean Damascene, wahoze mu ngabo z’u Rwanda kuri ubu akaba ari mu kiruhuko cy’izabukuru , akaba n’umwe mu bahatanira kuyobora Ishyirahamwe ry’umupira w’Amaguru mu Rwanda, FERWAFA, yavuze ko kuva muri 2000 yafashe icyemezo gikomeye cyo kutazasubira ku bibuga bikinirwaho umupira w’amaguru hano mu Rwanda bitewe n’imyanzuro yabonaga idasobanutse yafatwaga n’abayoboraga FERWAFA icyo gihe.

(Rtd) Brig. Gen. Sekamana yatangaje ibi kuri uyu wa gatanu tariki 16 Werurwe 2018, mu kiganiro yagiranye n’abanyamakuru kuri Ubumwe Grande Hotel aho yabagezagaho zimwe mu mpamvu zamuteye kwiyamariza kuyobora FERWAFA ndetse n’impinduka azazana muri iri shyirahamwe naramuka abaye Perezida waryo.

Gen (Rtd) Jean Damascene Sekamana

Uyu mugabo wahoze mu Ngabo z’u Rwanda yabwiye itangazamakuru ko hari ibyemezo byafatwaga n’abayobozi ba FERWAFA, atemeranyaga nabyo ari nabyo byamuteye gufata umwanzuro udasanzwe wo gusezera ku bibuga bikinirwaho amarushanwa y’umupira w’amaguru hano mu Rwanda. Imwe mu myanzuro yavuze yafatwaga ikamubangamira ngo ni nk’igihe (hari muri 1998), ikipe ya Rayon Sports yigeze guhabwa igikombe cy’amahoro idakinnye.

“Ntabwo nishimiraga imwe mu myanzuro yafatwaga. Hari nk’ubwo bemeje ko Rayon sports itwara igikombe cy’amahoro idakinnye (mu 1998). Ibyo n’ibindi ntishimiraga hamwe n’imiterere y’akazi kanjye byatumye mfata umwanzuro wo kumara imyaka 20 ntareba imipira iyi mwita iy’ibihugu. Najyaga kuri stade mu zindi gahunda z’akazi kanjye ariko sinajyaga yo mu mipira.”

Umwanzuro wo kutagera kuri stade zikinirwaho ruhago yafashe mu 2000 Sekamana yemeza ko yiteguye kuwurengaho mu gihe yaba yatorerwa kuyobora FERWAFA. Gusa ngo nadatorwa nta kizahinduka azaguma kure y’umupira w’amaguru nkuko yari asanzwe.Imyaka amaze arebera imiyoborere y’umupira hanze yawo abona yaramugiriye akamaro kuko yasesenguye ibyo asabwa ngo ateze imbere FERWAFA birimo kwita ku mupira w’amaguru w’abakiri bato no kurema umupira w’abagore kuko abona nta usanzwe ubaho.

Rtd Brig. Gen Sekamana uhanganye na Rurangirwa Louis kuri uyu mwanya akomeza avuga ko yari yarafashe umwanzuro wo kumara imyaka 20 atareba umupira w’amaguru mu Rwanda ariko ngo naramuka atorewe kuyobora FERWAFA ararenga kuri iki cyemezo akaboneraho gukosora ibyo yita ko biri mu manegeka ariko ngo nadatorwa n’ubundi azakomeza abe kure y’umupira w’amaguru mu Rwanda.

Brig. Gen. Sekamana Jean Damascene na Rurangirwa Louis nibo bazavamo uzasimbura Nzamwita Vincent De Gaulle ku mwanya wa Perezida wa FERWAFA mu matora ateganyijwe kuba kuwa 31 Werurwe guhera saa munani z’amanywa. 

Sekamana arifuza kuyobora FERWAFA ari umuyobozi wa 13 kuko kuva mu 1978 yayobowe n’abagabo 12;

Dr Gasarasi wayoboye kuva 1976-1978,
Mudenge Canisius: 1978-1982,
Félicien Ngango 1982-1986,
Mayuya Stanislas 1986-1987,
Faustin Twagiramungu 1987-1988,
Dr Emmanuel Ndagijimana 1988-1991,
Mvuyekure Viateur 1992-1993,
Gasasira Ephraim 1994-1995,
Lt. Gen. Caezar Kayizari, 1995-2005,
Maj Gen. Kazura Jean Bosco 2006-2011,
Ntagungira Céléstin alias Abega 2011-2013,
Nzamwita ‘De Gaulle’ Vincent 2014-2018

Tanga igitekerezo na Facebook

Tanga igitekerezo

Powered by Live Score & Live Score App