Richard Tardy yasubiye iwabo

Umufaransa Richard Tardy wari umaze kumenyekana cyane mu mupira w’amaguru w’u Rwanda ubu yarangije kugera iwabo mu Buafransa kuko amasezerano ye na Minisiteri ya Sports yarangiye ku ya 30.06.2014.

izina rye ntabwo abakunzi b’umupira w’amaguru bazaryibagirwa mu Rwanda, ntabwo azibukirwa ku kujyana ikipe y’igihugu y’u Rwanda (U17) bwa mbere mu gikombe cy’Isi gusa, ahubwo abukirwa no ku kuzamura impano z’abana b’abanyarwanda no kwereka abanyarwanda ko ubwabo bashobora gukina batarinze guhimba amazina abacongoman.

Uyu mugabo yageze mu Rwanda muri Kanama 2010 aje muri gahunda ya FIFA mu bujyanye no gutangiza ishuri ry’umupira w’amaguru rya FERWAFA.

tardy

Ntibyatinze mu mwaka wa 2011 mu kwezi kwa munani nibwo yakoze igikorwa gikomeye cyo kujyana u Rwanda mu gikombe cy’isi cy’abatarengeje imyaka 17 cyabereye muri Mexique. Nubwo ariko u Rwanda rwaviriyemo ku mutaru ntibyabujije abo bana kuhavana experience ku buryo ubu bamwe bari kubarizwa mu makipe akomeye hano mu gihugu ( Faustin Usengimana, Emery Bayisenge,Michel Rusheshangoga, Robert Ndatimana…)

Richard Tardy u Rwanda rwamubonyemo impano yo gutoza abana icyo gihe, ahabwa ndetse no gutoza abatarengeje imyaka 20 ndetse akarusho  muri 2012 agirwa ‘Directeur Technique” w’umupira w’amaguru mu Rwanda.

Icyatunguye abankurikira umupira wo mu Rwanda ni ukutongererwa  amasezerano yagombaga kurangira tariki ya 30 /06/2014, kandi yari yanditse asaba kongererwa amasezerano ariko ntasubizwe.

Mu kwezi gushize Umuyobozi w’Ishyirahamwe ry’umupira w’amaguru mu Rwanda Vicent de Gaulle Nzamwita yatangaje ko Richard Tardy amasezerano narangira yemerewe gupiganirwa umwanya nk’abandi bazaba babyifuza.

Andi makuru avuga ko  Kim Poulsen wahoze atoza ikipe y’igihugu ya Tanzania ariwe waba ugiye kuza gusimbura Richard Tardy. Poulsen ukomoka muri Danmark , akaba mu kwezi kwa gatanu yari yanahataniye gutoza ikipe y’u Rwanda Amavubi, n’ubwo uyu mwana waje guhabwa umwongereza Stephen Constantine.

Richard Tardy uvuye mu Rwanda ni inzobere mu mupira w’amaguru cyane cyane mu bana, mu gihe cy’imyaka 15 ishize yatoje mu bihugu by’Ubugereki, ikipe y’igihugu ya Liban, ikipe ya Africa Sports muri Cote d’Ivoire, muri Algeria. muri UAE, muri Maroc, muri Qatar, ndetse n’ikipe ya Saint Etienne iwabo mu Bufaransa mbere yo kuza mu Rwanda mu 2010.

Mbere yo kurira indege, kuri uyu wa 27 Kamena yatangaje ko kuko amasezerano ya yariho arangira yasabye ‘federation’ kongera amasezerano ye ariko ntibamusubize, kandi ko Visa ye nayo yariho irangira bityo afata icyemezo cyo utaha.  Ku mwanya wa Directeur technique yavuze ko nawe yatanze ‘candidature’ ye nk’abandi ariko atarasubizwa.

Tanga igitekerezo na Facebook

Tanga igitekerezo