Richard Tardy wahoze muri Ferwafa yahawe akazi muri Singapore

Yanditswe na Admin ku wa 23.07.2015 saa 09:38 | Yasuwe : 1,080

Richard Tardy, wahoze atoza ikipe y’igihugu Amavubi y’abatarengeje imyaka 17  na 20, akajyana  bwa mbere ikipe y’u Rwanda U-17 mu gikombe cy’Isi muri 2011, yamaze kugirwa umutoza w’amakipe y’igihugu y’abato muri Singapore.

Uyu mufaransa w’imyaka 64 azajya avanga akazi ke no gutegura gahunda y’iterambere ry’umupira ushingiye ku bana muri icyo  gihugu.

Uyu mutoza   wabaye n’umuyobozi wa tekiniki muri FERWAFA yahawe aka kazi kuri uyu wa kabiri taliki 21 Nyakanga 2015  nyuma y’umwaka  avuye mu Rwanda kuko amasezerano ye yarangiye taliki 28 Kamena 2014.

Yasabwe  gutegura gahunda y’igihe kirekire yo kuzamura umupira ushingiye ku bana muri iki gihugu, aho azajya aha amahugurwa abatoza b’abana anategure n’amarushanwa y’abana.Yanategetswe kujya akorana hafi na hafi  Michel Sablon umuyobozi wa  teninike mu ishyirahamwe ry’umupira w’amaguru muri Singapore.

tardy

Tardy wakoze aka akazi mu myaka ine mu Rwanda, yatangarije  urubuga Channel News Asia dukesha iyi nkuru  ko ubunararibonye yakuye mu bihugu yagiye acamo ari bwo buzamufasha muri iyi mirimo.

Ati “Nishimiye guhabwa aka akazi, ndizera ko ubunararibonye nakuye  mu bihugu nanyuzemo aribwo buzamfasha. Nishimiye no gukorana na Michel umwe mu bayobozi ba tekinike beza ku isi, nzi ko hari aho tuzageza umupira wa Singapore”.

Tardy ni umwe mu bafite ubunararibonye mu gutoza abana kuko usibye mu Rwanda yatoje Amavubi U-17 na U20, yabaye n’umutoza wungirije w’ikipe y’u Bafaransa y’abatarengeje  20 yatwaye igikombe cy’u Burayi cyo mu 1996.

Tanga igitekerezo na Facebook

Tanga igitekerezo