Rayon yazukiye kuri Musanze nyuma y’imikino icumi nta ntsinzi

Yanditswe na Rwanda Football ku wa 09.02.2015 saa 17:24 | Yasuwe : 778

Rayon Sports nyuma yo gutandukana n’umutoza Andy Mfutila yongeye kubona intsinzi nyuma y’inikino icumi yose inganya cyangwa igatsindwa.Ibitego bya Sina Jerome na Muganza Isaac kuri stade Ubworoherane i Musanze nibyo byatuye abafana ba Rayon bongera guhumeka ibintu baherukaga mu Ugushyingo 2014 ubwo Andy Mfutila yageraga i Nyanza.

Sina Jerome wari umaze igihe adakina ashaka ibyangombwa byo kujya gukina muri Bosiniya yabanje mu kibuga mu gihe kapiteni wabo Ndayisenga Fuadi yari hanze kubera imvune yagize ku mukino wa Police FC.

Ntibyatinze kuko ku munota wa 10 gusa  Sina Jerome yatsinze igitego cya Rayon Sports ku ishoti yatereye inyuma y’urubuga rwa Musanze FC umunyezamu Ndayisaba Olivier ananirwa kuwugarura.Ni ku nshuro ya mbere Rayon Sports yabanje igitego mu mikino irindwi ya shampiyona.Musanze yagerageje kwishyura ariko imipira myinshi miremire bateraga ntigere neza kuri Kipson Atuheire na Mbaraga Jimmy (bombi batijwe na Police FC nyuma yo kutabona ibyangombwa bibemerera gukina nk’Abanyarwanda).

rayonmusanze15

Ku ikosa rya ba myugariro ba Musanze FC Sina Jerome witwaye neza muri uyu mukino yakinnye umupira batakaje ahereza Muganza Isaac wari wenyine atsinda igitego cya kabiri, Rayon Sports yaherukaga intsinzi nk’iyi tariki ya 8 Ugushyingo 2014 batsinda Gicumbi 2-0 nabwo Ndayisenga Fuadi atakinnye.

Musanze yashoboraga kugombora iki gitego ariko umupira bahanganiye na ba myugariro ba Rayon Sports bawukura imbere y’izamu nubwo umunyezamu Ndayishimiye Eric “Bakame” yagaragaye nk’uwababaye intoki.

Kuri uyu wa Gatatu, Rayon Sports irerekeza muri Cameroun gukina na Panthères du Ndé kuwa Gatandatu mu mikino nyafurika y’amakipe yatwaye ibikombe iwabo, CAF confederation cup.

Indi mikino y’umunsi wa 16, APR FC yatsindiye Etincelles i Rubavu igitego cya Iranzi Jean Claude iguma ku mwanya wa mbere mu gihe AS Kigali ya kabiri yatsinzwe na Marines ibitego 2-0 bya Muvunyi Haruna na Nzabonimpa Prosper. Ku nshuro ya mbere muri shampiyona, Isonga FC yatsinze umukino wa mbere muri 15 bamaze gukina, igitego cya Usengimana Dany bakina na Espoir FC.Kiyovu Sports yatsinze Mukura VS igitego 1-0 cya Miami Mbakiye naho Amagaju atsindwa na Gicumbi ibitego 3-2.

APR FC ni iya mbere n’amanota 35, AS Kigali 28, Rayon Sports 25 naho Police FC ya kane inganya na Gicumbi amanota 24.

Tanga igitekerezo na Facebook

Tanga igitekerezo