Rayon Sports yihanangirije Isonga iyitsinda 5-0

Ikipe ya Rayon Sports imaze kwihererana kuri uyu wa kabiri ikipe y’ Isonga FC iyitsinda ibitego bitanu byose ku busa ku munsi wa kabiri wa shampiyona.

Muri uyu mukino wari wakiriwe n’Isonga kuri stade ya Kigali i Nyamirambo umutoza Sosthéne yashyizemo ikipe isa nk’iyo yakinishije ku magaju uretse umusore Sincère wari wasimbuye Usengemiana Faustin wavunitse mu ba kabiri.

Umukino watangiye Isonga ishaka kurinda izamu gusa ubundi igakoresha contre attaque.Ntibyatinze ariko kuko ku munota wa 17 gusa rutahizamu Peter Otema yari yatsinze igitego cya mbere nkuko yabigenje ku mukino wa mbere Rayon Sports yatsizemo Amagaju, igitego yatsinze nyuma ya za corner zikurikiranye ku mupira yari akatiwe na capitaine Fuadi.

rayonisonga14

Isonga nayo yahise ikanguka ariko ba rutahizamu bayo ntibabashe gusatira cyane izamu ryari ririnzwe na Bakame.Rayon Sports yatangiye gusatira bigaragara ikipe y’ Isonga biyiviramo kubona igitego cya 2 ku munota wa 35,ku mupira wahinduwe na Peter Otema  umuzamu ntiyawufata neza maze usanga Havugarurema Jean Paul  Lalo ahagaze neza ahita yinjiza igitego cya 2,Igice cya mbere gihita kirangira ari 2-0.

Mu gice cya kabiri nta cyahindutse kuko  Rayon Sports yakomeje kurusha cyane Isonga maze Lomami Frank wari usimbuye Songa Isaie ahita atsinda gitego cya 3.

Mu minota ya nyuma Bizimana Djihad  yatsinze ibitego bibiri byikurikiranya kimwe  kuri Coup franc, ikindi ku mupira wari uvuye muri Corner maze umukino urangira ari ibitego 5-0.

rayonisonga14

Habimana Sosthene umutoza wa Rayon Sports yatangaje ko yishimye kubera abakinnyi bashya batangiye kumenyerana kandi bakitwara neza. Avuga ko bazajya bakina kabiri mu cyumweru, bityo hakaba hari abazajya bakina n’abazajya basiba, ariko bazajya bashyiramo imbaraga ku mukino bafite uwo ariwo wose. Uyu mutoza avuga ko bagiye gutegura abakinnyi mu mutwe kugira ngo barusheho kwitwara neza.Habimana arangizaza avuga ko bafite ikibazo cya ba myugariro n’abakinnyi bataha izamu ariko bakaba bagomba kugikemura.

Rayon Sports ikaba ihise iyobora urutonde by’agateganyo n’amanota 6. 

Indi mikino iteganyijwe kuri uyu wa gatatu :  

  • AS Kigali vs APR FC (Stade de Kigali)
  • Police FC vs Kiyovu Sports (Kicukiro)
  • Amagaju vs Espoir FC (Nyagisenyi)
  • Mukura VS vs Gicumbi (Stade de l’Amitie Mumena)
  • Musanze FC vs Etincelles (Nyakinama)
  • Marines FC vs Sunrise (Stade Umuganda)
Tanga igitekerezo na Facebook

Tanga igitekerezo