Rayon Sports yatsinzwe na Gicumbi

Yanditswe na Admin ku wa 19.03.2015 saa 21:07 | Yasuwe : 704

Ikipe ya Rayon Sports imaze gutsindwa na Gicumbi FC ibitego 2-1 nyuma yo guhabwa ibihano n’Ishyirahamwe ry’umupira w’amaguru ku Isi (FIFA).

Ibitego bya Gicumbi FC byatsinzwe na Hamad Hakorimana ku munota wa 10 naho icya kabiri gitsindwa na Mawombi Jean Pierre ku munota 84.Igitego rukumbi  cya Rayon Sports cyatsinzwe n’umusore  Lomami Frank ku munota wa 45 w’igice cya mbere.

Nkuko bimaze kumenyerwa Rayon Sports yabonye Penaliti muri uyu mukino maze umurundi Kwizera Pierrot ayitera ku mutambiko .

Umutoza wa Gicumbi FC wungirije, Nsengimana Justin atangaza ko byabashimishije gutsinda uwo mukino kuko bari bamaze iminsi batabona intsinzi.Yagize ati “byadushimishije, ntabwo twari duherutse gutsinda, ariko byaduhaye imbaraga zo gukomeza kwitwara neza”.

aprray15u

Abafana ba rayon Sports mu gihirahiro

Uyu mutoza avuga ko batagomba gutanga akaruhuko ku bakinnyi babo, ahubwo bagomba gukomeza imyitozo mu rwego rwo kurushaho kwitegura indi mikino. Nsengimana akomeza avuga ko gutsinda Rayon Sports biba bitoroshye, kuri ubwo kuba babashije kubigeraho bibahaye izindi mbaraga n’abakinnyi bagakomeza kurushaho kwitwara neza.

Ati “icyo tugiye gukora ni ugutegura umukino wo mu mpera z’icyumweru tukitwara neza, kubera ko tumaze n’iminsi tudatsinda imikino twakiriye”.

FIFA yasabye Ishyirahamwe ry’umupira w’amaguru mu Rwanda (Ferwafa) ko ryakuraho amanota 3 Rayon Sports kubera kutishyura Raoul Shungu wahoze ayitoza.Kuri ubu ikipe ya Rayon Sports igeze ku mwanya wa 8 n’amanota 24 muri shampiyona y’icyiciro cya mbere mu mupira w’amaguru mu Rwanda.

Kuva Gicumbi FC itsinze uwo mukino ihise igera ku mwanya wa 4 n’amanota 30 muri shampiyona.

Tanga igitekerezo na Facebook

Tanga igitekerezo