Rayon Sports yasezereye Hussein Sibomana

Yanditswe na Admin ku wa 08.09.2014 saa 16:43 | Yasuwe : 882

Umukinnyi myugariro Sibomana Hussein wari umaze imyaka ibiri akinira ikipe ya Rayon Sports, yamaze gusezererwa. 

Ntampaka Théogène umuyobozi w’ikipe ya Rayon sports, avuga ko uyu musore yamaze guhabwa icyangombwa kimwemerera kuva muri Rayon Sports ngo yishakire indi kipe.

Mu kiganiro yagiranye n’ikinyamakuru Izuba Rirashe dukesha iyi nkuru, Ntampaka Théogène yagize ati “Hussein twamaze kumuha ibaruwa imusezerera (release letter) ndetse nta n’ubwo ari mu rutonde rw’abakinnyi turi butange mu ishyirahamwe ry’umupira w’amaguru mu Rwanda kuko atakiri umukinnyi wacu, twirinze ko duhura n’ibibazo by’abanyamahanga bagiye bahindura amazina kuko na Sibomana ari muri uwo mubare, ikibazo dusigaranye n’icya Arafat Serugendo nawe ushobora kuba yarahinduriwe amazina, ariko we atubwira ko afite indangamuntu ndetse Serugendo ariyo mazina ye, we twabaye tumugumanye.”

Ntampaka avuga ko ku rutonde rwa Rayon Sports ruri butangwe muri FERWAFA, nta mukinnyi mushya wiyongeramo usibye abagaragaye muri iyi kipe bakina CECAFA Kagame Cup, ndetse ko nta n’undi mukinnyi mushya bateganya kongeramo.

husseinsibomana1
Uyu muyobozi wa Rayon yakomeje avuga ko abakinnyi bose bashya bagaragaye muri CECAFA bamaze kubasinyisha usibye Koffi Geulli ukomoka muri Togo batararangiza kumvikana neza ati  “Koffi umujyanama we hari ibyo yadusabye tutaratunganya, ntituremeza ko azadukinira kuko ibyo tukiri kubiganira ndetse n’umusaruro we uracyemangwa, Yossa Bertrand we twamaze kumusinyisha ndetse na Mutombo Govin ibye twarabirangije kandi na Espoir yavugaga ko ari umukinnyi wayo twamaze kumvikana, mbese abakinnyi bose twakinishije CECAFA tuzagumana badufashe muri iyi shampiyona igiye gutangira.”

Ntampaka avuga ko bamwe mu bakinnyi bashya bagaragaye muri Rayon kuri iki cyumweru ikina na Mukura mu mukino wa gishuti batsinzwemo 1-0 batazabasinyisha.

Kuri uyu wa mbere tariki ya 8 Nzeli 2014 nibwo amakipe yose ageza kuri FERWAFA urutonde rw’abakinnyi azakoresha. Muri ayo ma lisiti buri mukinnyi asabwe gushyiraho ibyangombwa bye by’umwimerere ndetse n’abahinduriwe amazina kubera ubwenegihugu bagahabwa ibyangombwa birimo ayo mazina yabo.

Tanga igitekerezo na Facebook

Tanga igitekerezo