Rayon Sports yaraye kuri ‘Reception’ ya Hotel itegereje indege

Yanditswe na Admin ku wa 13.03.2015 saa 15:46 | Yasuwe : 867

Ijoro ryo kuri uyu wa kane tariki 12 Werurwe rishyira uyu wa gatanu, abakinnyi ba Rayon bari mu Misiri baraye bose kuri reception ya Hotel bategereje indege ibajyana El Gouna aho bazakinira umukino na Zamalek kuko nta bushobozi bwo kujya muri Hotel ikipe yari isigaranye.

Rayon Sports igeze i Cairo yashyizwe muri Hotel y’inyenyeri eshanu aho ikipe yose yishyura amafaranga  miliyoni ebyiri ku munsi kubera ko yangiwe gucumbika muri Hotel yihitiyemo yari kuba iciriritse kuri iyi bitewe ngo n’impamvu z’umutekano .

Nyuma y’imyitozo yo kuwa kane bakoreye i Cairo babwiwe ko saa cyenda z’igicuku kuri uyu wa gatanu ari bwo babona indege iberekeza mu mujyi wa El Gouna uri ku 432Km uvuye i Cairo   aho bazakinira na Zamalek.

Abayobozi ba rayon Sports babwiye ikipe ko nta bushobozi busigaye bwo kongera kuryama muri Hotel ijoro ryakeye kuko bari bufate indege mu rukerera, bityo bakwiye kureba uko bategereza indege kuri reception ya hotel.Abakinnyi bananiwe kandi bashonje bategereje ijoro ryose indege ya saa cyenda z’igicuku ibajyana i El Gouna aho bageze bakabona aho bitoreza.

rayonzamalek

Photos Umuseke

Ibiri kuba kuri iyi kipe ni inkurikizi z’ihanahanamakuru ribi hagati ya CAF, FERWAFA na Zamalek kuri Rayon Sports. Iyi kipe akaba ari yo iri kubibabariramo mu gihe ziriya mpande buri rumwe rwitakana urundi.

Nta mpamvu yasobanutse yatumye Zamalek Sports Club, ikipe yo mu rusisiro rwa Meet Okba mu mujyi wa Giza muri 20Km uvuye rwagati mu mujyi wa Cairo, ijyana umukino wa Rayon Sports i El Gouna muri 432Km uvuye Cairo.

FERWAFA ikaba yaratangaje ko Zamalek yamenyesheje ko umukino uri ku cyumweru tariki 15 Werurwe ku munsi Rayon Sports yahagurutseho, nubwo ngo CAF nayo itari yakamenyesheje FERWAFA na Rayon Sports iby’izi mpinduka.

Umukino wa CAF Confederation Cup wa Rayon Sports na Zamalek utegerejwe ku gicamunsi cyo ku cyumweru mu Misiri.

Tanga igitekerezo na Facebook

Tanga igitekerezo