Rayon Sports yarangije kwishyura Raul Shungu

Yanditswe na Admin ku wa 26.03.2015 saa 22:19 | Yasuwe : 1,194

Ikipe ya Rayon Sports yemeza ko yamaze kwishyura Raoul Shungu umwenda ungana n’amadorari ibihumbi 15 $ yari mufitiye nyuma yo guhanwa n’ishyirahamwe ry’umupira w’amaguru ku isi (FIFA).

Mu cyumweru gishize umuvugizi w’ikipe ya Rayon sports,  Aimé Emmanuel Niyomusabye yavuze ko biramutse bikunze bajya kureba uyu mutoza i Kinshasa bakamwishyura aya mafranga ndetse akabasinyira ko  ayabonye. Niyomusabye yagize ati “ubundi FERWAFA yari yemeye kutuguriza tukishyura ideni rya Raoul, ariko yaje kugira ikibazo cy’ingwate twagombaga kuyiha, ubu turasa nk’aho ibi twabyumvikanyeho, bagiye kutuguriza amafranga ya Raoul tuyamushyire i Kinshasa.”

Umuyobozi w’ikipe ya Rayon Sports, Ntampaka Théogène kuri uyu  wa kane tariki ya 26 Werurwe 2015 yatangaje ko mu biganiro bamaze kugirana na Ferwafa ku munsi w’ejo bamaze kwishyura Raoul Shungu bategereje ko ababwira ko amafaranga yamugezeho.Yagize ati “mu cyumweru cyashize twari twaganiriye na Ferwafa twemera umwenda nabo bemera kuduha amafaranga tukishyura ariko ejo hashize twati twasubiyeyo kureba niba byashyizwe mu bikorwa ndetse tunavugana na Raoul kuri Telefone abasha kutworohereza”.

Umunyamakuru yamaubajije ko bamaze kwishyura Raoul nyuma Ferwafa yabagurije yo bazayishyura bate? Asubiza agira ati “icyari kigoye ni ukwishyura uyu mutoza ibijyanye no kwishyura Ferwafa byo tuzabivugana kuko tubana mu buzima bwa buri munsi ndetse turi nabanyamuryango babo”.Akomeza avuga ko igihe bari bihaye ntarengwa hari hasigaye iminsi 6 ngo niba batarubahiriza ibyo biyemeje FIFA ibe yakomeza ibihano.

raulshungu
Umunyamabanga mukuru w’ishyirahamwe ry’umupira w’amaguru mu Rwanda Mulindahabi Olivier avuga ko bamaze kuvugana na Rayon Sports ndetse bakaba bamaze kwishyura Raoul.

Tariki ya 16 Gashyantare uyu mwaka umunyambanga wungirije w’akanama gashinzwe imyitwarire muri FIFA Alejandra Salmeron Garcia, yandikiye ibaruwa Ferwafa igira iti ” nyuma y’aho tumenyeshejwe ko ikipe yanyu ya Rayon Sports yanze kubahiriza umwanzuro wari ukubiye mu ibaruwa y’akanama twari twatanze tariki ya 25 Ugushyingo 2014 ntiyubahirizwa nibwo twafashe umwanzuro wo gusaba federasiyo yanyu gukurikiza itegeko rya kane ry’uwo mwanzuro ryo gukuraho amanota atatu ku ikipe ya Rayon Sports ikina mu cyiciro cya mbere kandi mukatugezaho icyerekana ko ayo manota mwayakuyeho kuri iyo kipe”.

Raul Shungu yari umutoza wa Rayon Sports muri 2009 yirukanwa agifite amasezerano ntiyahabwa imperekeza, areze mu Ishyirahamwe ry’umupira w’amaguru ku isi (FIFA), umwanzuro ufatwa tariki ya 26 Werurwe 2012.

Rayon Sports nyuma yo kwandikirwa na FIFA yari yemeye kuyishyura mu byiciro 3, ibyiciro bibiri byari byarishyuwe hasigaye icyiciro cya nyuma.

Tanga igitekerezo na Facebook

Tanga igitekerezo