Rayon Sports yanyagiye Rugende imvura y’ibitego mu gikombe cy’amahoro

Yanditswe na Rwanda Football ku wa 20.04.2017 saa 08:09 | Yasuwe : 101

Mu mukino wa mbere w’igikombe cy’Amahoro Rayon sports ari nayo ifite iki gikombe yanyagiye Rugende Football Club yo mu cyiciro cya kabiri ibitego 9 – 0 birimo ‘Hatrick’ ya Nahimana Shasir wari umaze igihe adakina kubera imvune.

Uyu mukino wabereye kuri Stade Regional ya Kigali aho Rugende FC yari yakiriyr  Rayon sports mu mukino utitabiriwe n’abafana benshi.

Tidiane Kone yafunguye amazamu ku munota wa 14 w’umukino, ku kazi gakomeye kari gakozwe na Nsengiyumva Moustapha wakinaga uruhande rwose rw’iburyo (right wing-back).

Myugariro wa Rugende FC agerageza kwaka Tidiane Kone umupira mu gice cya mbere

Nyuma yo kubona iki gitego Rayon sports yakomeje gusatira no kotsa igitutu ubwugarizi bwa Rugende FC yo mu kiciro cya kabiri bivamo penaliti ku munota wa 21 ku ikosa ryakorewe Tidiane Kone.

Penaliti yatewe na Lomami Frank arayinjiza kiba igitegi cya mbere atsindiye Rayon sports muri uyu mwaka w’imikino.

Abatoza ba Rayon bayobowe na Masudi Djuma (hagati) bishimiye gutangira neza igikombe cy’amahoro bitegura Rivers United

Ku munota wa 37 Nahimana Shasir yahawe umupira na Muhire Kevin nawe atsinda igitego cya gatatu cya Rayon sports nyuma y’ukwezi yari amaze adakina.

Mbere y’uko igice cya mbere kirangira Lomami Frank yatsinze igitego cya kane ku mupira yahinduriwe na Nsengiyumva Moustapha.

Lomami Frank agiye gutera Penaliti yavuyemo igitego cya gatatu

Mu munota umwe gusa wongeweho Rayon Sports yabonye Coup franc Ange Mutsinzi atsinda igitego cy’ishoti bituma igice cya mbere ari 5-0.

Nyuma y’iminota ibiri igice cya kabiri gitangiye Tidiane Kone yazamukanye umupira yihuta, awuhinduye imbere y’izamu myugariro Jean Pierre wa Rugende aritsinda.

Nsengiyumva Moustapha watanze imipira itatu mu icyenda yavuyemo ibitego

Masudi Djuma yakoze impinduka yongeramo amaraso mashya, Nizeyimana Idrissa yafashe umwanya wa Mugisha Francois Master, Nova Bayama asimbura Abouba Sibomana.

Byatumye Rayon sports ikomeza gusatira, ibona ibindi bitego bitatu byatsinzwe na Idrissa na Nahimana Shasir watsinze bibiri mu gice cya kabiri.

Lomami Frank yishimira igitego cya mbere atsindiye Rayon sports kuva uyu mwaka w’imikino watangira
Uyu mukino warangiye Rayon sports itsinze Rugende FC ibitego 9-0 ubaye iminsi itatu gusa mbere yo kwakira Rivers United yo muri Nigeria muri CAF Confederation Cup 2017.
Mutsinzi Ange na Lomami Frank bitwaye neza muri uyu mukino

Abakinnyi babanje mu kibuga :

Rugende FC
Rayon Sports FC

Imikino yabaye kuri uyu Kabiri:

Esperance SK 1-4 Espoir Fc
Vision Fc 0-3 APR Fc
Pepiniere Fc 0-1 Marines Fc
Musanze Fc 3-0 Isonga Fc

Muri rusange dore uko imikino yagenze:
• Rugende 0-9 Rayon Sports
• Heroes Fc 0-1 AS Kigali
• Etoile de l’est 1-1 SC Kiyovu
• Akagera Fc 1-2 Amagaju Fc
• Vision JN 0-4 AS Muhanga
• Miroplast Fc 0-2 Gicumbi Fc
• United Stars Fc 0-1 Police Fc
• Hope Fc 1-1 Bugesera Fc
• Aspor Fc 0-2 La Jeunesse Fc
• Kirehe Fc 0-2 Etincelles Fc
• Intare Fc 0-4 Mukura VS
• Rwamagana City Fc 0-2 Sunrise Fc

Tanga igitekerezo na Facebook

Tanga igitekerezo