Rayon Sports yanganyije na Sunrise, APR iguma ari iya mbere

Yanditswe na Admin ku wa 30.11.2014 saa 20:04 | Yasuwe : 1,070

Ubwo hakinwaga imikino y’umunsi wa cyenda wa shampiyona  APR FC nubwo  yatsinzwe umukino wayo  wa mbere muri shampiyona  ntibyayibujije kuguma ku ntebe y’icyubahiro nyuma yaho Rayon Sports inganyirije na Sunrise i Rwamagana

Kuri iki cyumweru Rayon Sports yari yasuye Sunrise iwayo i Rwamagana , umukino wari witezwe n’abakunzi benshi ba Rayon Sports  bari bategerje ko ikipe yabo itsinda igahita ifata umwanya wa mbere.

Ni umukino wabereye ku kibuga cy’i Rwamagana imbere y’abakunzi benshi b’umupira w’amaguru bari biganjemo abafana b’ikipe ya Rayon Sports n’abaturage b’i Rwamagana abenshi bwari ubwa mbere babonye iyo kipe y’i Nyanza ikinira iwabo.

Mbere gato y’uko umukino utangira, i Rwamagana haguye imvura byatumye ikibuga cyaho kirimo ubwatsi bwa kimeze kinyerera.Umukino watangiranye ikirego cyanditswe na Sunrise bavuga ko Sina Jerome adafite ibyangombwa byo gukinira Rayon Sports cyasinyweho naba kapiteni bombi.

rayonsunrise1415d

Rayon Sports yakinaga uyu mukino idafite umutoza mukuru wayo Andy Mfutila wasubiye iwabo gutegura kwimukira i Nyanza n’abakinnyi Usengimana Faustin, Ndatimana Robert , Bizimana Djihad bafite amakarita abiri y’umuhondo wongeyeho kapiteni Fuadi na Tubane James barwaye.

Ku munota wa 31 w’umukino nibwo Isaac Muganza yafunguye amazamu ku mupira yari ahawe neza na Peter Otema ,Sunrise itegereza umunota wa 79 ngo yishyure kuri panaliti yatewe na Munyankindi Patrick ku ikosa yari akorewe na Majyambere Alype.

Ni umukino ku ruhande rwa Rayon Sports wagaragayemo Sina Jerome wari umaze iminsi adakina, nyuma yuko ibibazo bye yagiranye na Rayon Sports na Police FC birangiye.

Apr FC niyo yari yakiriye Gicumbi mu mukino wabereye kuri sitade y’i Nyamirambo , umukino utitabiriwe na busa ibi bikaba bikomeje kwibazwaho n’abakunzi b’umupira w’amaguru batiyumvisha ukuntu umukino w’ikipe ifite umwanya wa mbere urebwa n’abantu batarenze 100.

APR FC nubwo bizwi ko ifite abakinnyi benshi kandi beza batoranyijwe mu Rwanda yaburagamo umwe mu bakinnyi bayo bakomeye Mugiraneza Jean Baptste mu kibuga hagati,wari ufite amakarita abiri  y’umuhondo,ntiyabashije kwihagararaho imbere ya Gicumbi FC yari yakaniye.

gicumbi14a

Igitego cya Gicumbi FC cyatsinzwe na Uwineza Jean D’Amour mu mpera z’igice cya mbere cy’umukino bigora cyane  abakinnyi ba APR FC kwishyura kugeza umukino urangira.

Mu wundi mukino wari utegerejwe cyane  kuri uyu wa gatandatu, ikipe ya Kiyovu Sports yatsindiwe ku kibuga cyayo ku Mumena  Espoir FC igitego 1-0, cya Harelimana Jean Damascene( Gisimba).

Ikipe ya Kiyovu nyuma yo kwitwara nrza mu cyumweru gishize inganya na Rayon Sports iakaba yarerekanye umukino mwiza, ntibyayihiriye kuri uyu wa gatandatu kuko yahuye na Espoir nayo yashakaga amanota atatu.

Muri uyu mukino, rutahizamu ukomeye cyane Mbakiye Miamy wa Kiyovu Sports na Mutunzi Clément wa Espoir babonyemo amakarita y’umutuku, amakipe yombi asoza ari abakinnyi 10.

Mu yindi mikino Mukura VS yatsinzwe n’amagaju ibitego bibiri irabyishyura itsinda icya gatatu ihita itahukana intsinzi yayo ya mbere ku munsi wa 9.

Imikino yose yabaye kuri iki cyumweru:

  • AS Kigali 3-1 Etincelles
  • Marines FC 1-0 Musanze FC
  • Sunrise 1-1 Rayon Sports
  • Mukura VS 3-2 Amagaju
  • Police FC 1-0 Isonga

Kur wa gatandatu:

APR FC 0-1 Gicumbi FC

Kiyovu Sports 0-1 Espoir FC

APR FC iracyari imbere n’amanota 20, igakurikirwa na Rayon Sports ifite amanota 18, inganya na AS Kigali, na yo ifite amanota 18.

Tanga igitekerezo na Facebook

Tanga igitekerezo