Rayon Sports yandagaje APR FC ihita igabanya ikinyuranyo cy’amanota (photos)

Yanditswe na Admin ku wa 03.05.2016 saa 22:03 | Yasuwe : 734

Abafana ba Rayon Sports basohotse  baririmba BINEZERO inzira yose kuva kuri Stade Amahoro i Remera mu mayira bataha, amahoni yari menshi cyane y’ibinyabiziga, amaruru na za Vuvuzela zumvikana hose mu bice byegereye Stade Amahoro, ibyishimo byari byinshi ku bafana b’ubururu n’umweru.

Ni nyuma y’uko iyi kipe y’abafana benshi cyane itsinze APR FC ibitego bine ku busa mu mukino w’umunsi wa 21 wa shampiyona.Uyu mukino watangiye saa kumi n’ebyiri z’umugoroba, APR FC yari yakiriye igaragaza amashagaga umukino ugitangira, ariko ba myugariro ba Rayon Sports bagahagarara neza.

Kuri stade Amahoro yari yuzuye no hejuru, ikipe ya Rayon Sports yaje ibizi ko gutsindwa umukino wa APR FC byari butume iva burundu ku gikombe cya shampiyona bityo ko undi musaruro uretse intsinzi, ntacyo wari buyimarire.Davis Kasirye umusore waturutse i Kampala na Ismalia Diarra bakoze ibyo abafana ba Rayon Sports baherukaga mu myaka myinshi ishize.

Ku munota wa munani gusa Rayon Sports yafunguye amazamu ku gitego cya Davis Kasirye ku ikosa ryari rikozwe na ba myugariro ba APR FC,  ku munota wa 31 Davis Kasirye asubizamo icya kabiri ku ishoti rikomeye yatereye hanze y’urubuga rw’amahina maze yiruka ajya kwishimana n’abafana ba Rayon bicara ahitwa mu ‘Ruhango’ (16  na 17).

Abakinnyi ba rayon Sports berekana ibitego bine batsinze mukeba
Abakinnyi ba rayon Sports berekana ibitego bine batsinze mukeba

Igice cya mbere cyarangiye ari bibiri ku busa bwa APR FC itigeze igaragara na busa mu kibuga nubwo nayo yari yabonye amahirwe nk’abiri meza yo gutsinda ariko ntibyashoboka.

Abantu benshi bibwiraga ko igice cya kabiri biza guhinduka tukabona ikipe yigaranzuye indi ariko siko byagenze kuko APR FC igice cya kabiri yagitangiye ishaka kwishyura cyane, ariko ihita icibwa intege n’uko ku munota wa 46 gusa Ismael Diarra yahise abona igitego cya gatatu cya Rayon Sports ibintu birushaho gukomera kuri APR.

APR yashyizemo imbaraga ngo igerageze kwivanayo, ihererekanya neza kubera abasore bakinaga hagati nka Janvier Benedata na Yannick Mukunzi na Iranzi Jean Claude ariko imbere y’izamu rya Rayon Sports ntihagire icyo bahakorera gikomeye ba nyugariro Tubane James na Mnezero Fiston bakababera ibamba.

Nubwo APR ariyo yihariye umupira cyane kuko yashakaga kwishyura Rayon Sports yanyuzagamo yafata umupira igakinisha impande cyane cyane kwa Nshuti Dominic Xavio wacaga ibumoso.

APR yakomeje gushakisha iciye ku mpande nayo igatera za centres bashakisha rutahizamu Michel Ndahinduka ariko abugaririzi ba Rayon bagaharara neza.

Ku munota wa 88 aherejwe neza cyane na Nshuti Xavio utagaragaye cyane uyu munsi, rutahizamu Davis Kasirye yatsinze igitego cya gatatu cye ari nacyo cya kane cya Rayon abanje gucenga myugariro Abdul Rwatubyaye ndetse n’umuzamu Ndoli Jean Claude, umukino urangira gutya.

Rayon Sports isa n’ivanyeho ikinegu cy’umwaka ushize mu mukino nk’uyu wo kwishyura ubwo nayo yari yatsinzwe bine ku busa na APR FC ndetse yari yanayitsinze kimwe ku busa mu mukino ubanza, muri uyu mwaka bwo umukino ubanza amakipe yombi yari yanganyije ubusa ku busa.

Rayon Sports ubu ifashe umwanya wa kabiri n’amanota 45, aho iri inyuma ya APR FC ifite amanota 46 ariko Rayon Sports ikaba ifite umukino umwe izigamye.

Amafoto :

Tanga igitekerezo na Facebook

One thought on “Rayon Sports yandagaje APR FC ihita igabanya ikinyuranyo cy’amanota (photos)

Tanga igitekerezo