Rayon Sports yagujije Ferwafa ngo yishyure Raoul

Yanditswe na Admin ku wa 03.02.2015 saa 11:49 | Yasuwe : 513

Ishyirahamwe ry’umupira w’amaguru mu Rwanda (FERWAFA) rigiye kuguriza amafaranga Rayon Sports ngo yishyure umwenda ibereyemo uwahoze ari umutoza wayo Raoul Shungu.

Ibi bibaye nyuma y’aho Ishyirahamwe ry’umupira w’amaguru ku Isi (FIFA) ryari rigiye gufatira ibihano Rayon Sports kubera iki kibazo cya Raoul.

FERWAFA yagiranye inama n’abayobozi ba Rayon Sports kuri icyo kibazo, aho Umunyamabanga mukuru w’Ishyirahamwe ry’umupira w’amaguru mu Rwanda, Olivier Mulindahabi yatangaje ko bagishakiye umuti.

Mulindahabi yagize ati “twaricaye twiga kuba twagikemura. FERWAFA igomba gufasha Rayon Sports, ariko komite ya FERWAFA izaterana kuko dufite uburyo dusanzwe tuganira. Ni ubuyobozi bwa Rayon Sports bwadusabye ko twaganira kuri icyo kibazo”.

rayonpolice15a

Mu masezerano bateganya kugirana na Rayon Sports, arimo ko FERWAFA izayifasha muri byose nyuma bakazabishyura yose kubera ko ngo bazi ko amakipe afite ubushobozi buke kandi ngo ntacyo ishyirahamwe rizahungabanaho mu bijyanye n’amikoro.

Rayon Sports na yo yari yarashyizeho igihe igomba kwishyurira Shungu, ariko FIFA ikaba yari yasabye igihe gito ugereranyije n’igihe Rayon Sports yari yasabye ko yakwishyurira ayo mafaranga.

Ni nyuma y’ibiganiro byahuje abayobozi babiri; Nzamwita Vincent De Gaulle, umuyobozi FERWAFA na Ntampaka Theogene, umuyobozi wa Rayon Sports.

Rayon Sports ibereyemo Shungu umwenda w’Amadolari ya Amerika 18,943. Raul Shungu yatoje Rayon Sports mu 1989 kugeza muri 1994, yongera kuyigarukamo mu 1997 kugera muri 1998, ayisubiramo na none mu 2002 kugera muri 2003 ndetse no mu 2008 kugera 2009 ayihesha ibikombe bitandukanye birimo shampiyona yo mu 1997, mu 2002 no mu 2004.

Tanga igitekerezo na Facebook

Tanga igitekerezo