Rayon Sports yagiranye amasezerano na Skol.

Yanditswe na Rwanda Football ku wa 20.06.2014 saa 22:02 | Yasuwe : 991

Ikipe ya Rayon Sports FC ihagarariwe na Perezida wayo NTAMPAKA Theogene imaze gusinyana n’uruganda BMC rukora ibinyobwa birimo na SKOL amasezerano y’ubufatanye y’imyaka 3.

Ikipe ya Rayon Sports igiye kujya ihabwa Ibihumbi mirongo itanu by’ama Euros (€ 50,000) ni ukuvuga asanga Miliyoni mirongo ine na zirindwi z’amanyarwanda (Frw 47,000,000) nayo ikazajya yamamaza ibikorwa by’uruganda rwa BMC harimo n’ikinyobwa cya Skol .

Nubwo Ferwafa itari yatanze  Sous couvert( urwandiko rutanga uburenganzira) ntibyabujije Ubuyobozi bw’iyi kipe n’uruganda BMC gushyira  umukono kuri ayo masezerano yarategerejwe igihe kinini n’abakunzi b’iyi kipe.

rayonskol

Bwana NTAMPAKA Theogene yavuze ko kuba basinye na Skol mu gihe ibaruwa ya FERWAFA itaraboneka, ari uko n’ubundi Rayon Sports ari ikipe yujuje ibyangombwa ifite ubuzima gatozi kandi ko gukorana n’uwo ishaka ari uburenganzira bwayo. Ati gusa BMC ni yo yari yasabye ko habanza hakaboneka Sous couvert ya FERWAFA, ariko mu gihe twayisabye ntiboneke, tukaba twaraganiriye na Federation na Minisiteri tukareba uko ayo masezerano ntawe yaba abangamiye, twumva nta cyari kutubuza gusinya aya masezerano.

Tumubajije icyo iyinkuga niba izahita itangwa ikaba yafasha ikipe mu kwitegura shampiyona ndetse na CECAFA, Ntampaka Theogene yadutangarije ko aya masezerano atangira kubahirizwa mu gihe yashyiriweho umukono.

Nkuko Perezida wa Rayon Sports yakomeje abitangaza, aya masezerano aje ari aya kane bagiranye n’umufatanyabikorwa, nyuma ya Fast Forward, Ruhago Sport Promoterse n’abandi bakomeje kugirana ibiganiro n’iyi kipe.

Mu kwezi gushize Fast Forward ari yo yabanje gusinya ku ikubitiro na Rayon Sport ; yashyikirije ibikoresho bya mbere iyi kipe y’ I Nyanza, ndetse ubwo twandikaga iyi nkuru, amakuru atugeraho ni uko imwe mu myambaro y’abafana ejo yagejejwe I Kigali aho igiye kujya igurishwa mu bafana nabyo bizafasha ikipe.

Fast Forward ikazajya izagenera Rayon Sports inkunga ifite agaciro ka Miliyoni 22 muri uyu mwaka bafitanye amasezerano. Ikazaba iziyongera kuri miliyoni 47 zizatangwa na Skol, bidakuyeho inkunga ingana na Miyoni 40, Akarere ka Nyanza kayigeneraga buri mwaka, tutitabagiwe n’amafaranga ava ku bibuga iyi kipe yakiriye.

By’umwihariko ku nkunga ya Skol, buri mwaka hazajya hiyongeraho 20% ni ukuvuga 10,000 by’ama Euros ku mwaka uzakurikiraho, umwaka wundi hakiyongeraho 12,000 Euros.

Tubamenyeshe ko ikipe ya Rayon Sports ari yo kipe ya mbere mu Rwanda ifite abafana benshi, ikaba inabaye n’ikipe ya mbere ibonye abafatanyabikorwa bagiye kujya bayiha amafaranga n’ibikoresho birengeje agaciro ka Miliyoni 100 buri mwaka, ziyongera kuri Miliyoni 40 bahabwa n’Akarere ka Nyanza. Mu gihe umwaka ushize wa Shampiyona iyi kipe yakoresheje bije ( Bugdet) ya Miliyoni 160.

Bishoboke ko ikibazo cy’amikoro muri iyi kipe cyaba kigiye kuba amateka.

Tanga igitekerezo na Facebook

Tanga igitekerezo